Laurdag sparka rap-duoen Karpe i gang eit historisk prosjekt.
10 gonger i august fyller Chirag Rashmikant Patel og Magdi Omar Ytreeide Abdelmaguid Oslo Spektrum.
For eit useld Spektrum dansa og song dei, og Magdi køyrde ei kreativ variant av «stage diving» då han rei på ein stor oppblåsbar hai over publikum.
Den oppblåsbare haien har blitt ikonisk i sommar. Karpe hadde han blant anna med då dei gjesta Neon-festivalen i Trondheim og Slottsfjellfestivalen i Tønsberg.
Spektrum-konserten bestod mykje av låtar frå deira nyaste EP «Omar Sheriff». Det er første gang Karpe verkeleg leikar seg med å blande norsk og arabisk i låtane. Publikum fekk også eit gjenhøyr med dei mest populære innslaga frå den neste halvtime lange låten «SAS Plus/SAS Pussy» frå 2019.
Konsertrekkja skulle eigentleg vore spelt i august i 2021. Han blei som mange andre kulturarrangement utsett på grunn av koronapandemien. Showet blei lansert allereie i 2019.
– Noreg er ein ung nasjon når det kjem til multikultur. Og det er ein del upløyd mark når det gjeld å blande kultur og språk i musikken, har Chirag uttalt til NRK i forkant av konsertrekkja.
Flammane frå pyro-showet gjorde det heitt i Oslo Spektrum. Publikum tok ekstra av då Karpe spelte låten «jeg bruker ikke kondom».
Inviterte fotballag
Denne veka deltok 25 ungdommar frå Palestina og Libanon på Norway Cup.
På t-bana heim frå Ekebergsletta i Oslo dansa ungdommane til Karpe si låt PAF.no og la ut video på Instagram.
Det fekk rap-duoen med seg, og inviterte ungdommane til å kome på laurdagens konsert.
– Det er veldig gøy at dei vart merksame på oss, seier Altayeb Albuhaisi (14).
Han er ein av ungdommane, og skal i dag på sin første konsert.
– Eg gler meg veldig.
Dei stilte med to fotballag på Norway Cup, eit jentelag og eit gutelag.
Gutelaget vann bronse i cupen, og som takk for at dei får kome på konsert seier Albuhaisi at dei skal gi pokalen til Karpe.
Ungdommane er i Noreg i ei tid der heimstaden deira er under angrep.
Fredag sa Palestinske styresmakter at minst ti menneske er drepne og 79 skadde etter israelske angrep mot Gazastripa. Israel har varsla at angrepa vil halde fram ei veke til.
Gira publikummarar
Over 100.000 billettar til Karpe-konsertane er selde, og det er ingen som har hatt ti konsertar i Oslo Spektrum etter kvarandre.
NRK møtte Sofie Vold og Helena Tennøy i køen utanfor Spektrum tidlegare på kvelden. Dei har vore klare sidan dei kjøpte billettane i 2019.
– Vi er veldig gira! Vi har venta lenge, seier Vold.
– Eg har gleda meg til denne konserten skikkeleg lenge, og eg har høyrt på songane til Karpe i mange år, legg ho til.
Retting: I ein tidlegare versjon sto det at ungdommane frå Palestina og Libanon skulle møte Karpe. Den planen vart endra, slik at dei ikkje fekk høve til å møte rap-duoen likevel.