Forbrukarøkonom:– Forbausa over ferieauken

– Det er i nedgangstider folk kuttar det dei har lyst på, og prioriterer å sikre økonomien sin. Eg er forundra over at folk slår på stortromma i år når det gjeld ferie, seier forbrukarøkonom Silje Sandmæl i DnB.

• Les også: Småbarnsmor: – Nøye planlegging gjev fleire feriar

– Vi er som strutsar i sanden

Ho meiner for mange har blitt vande med at norsk økonomi har vore i oppgangstid.

– Eg er redd for at fleire kjem til å slite økonomisk framover, vi må tenkje på at veldig mange har høg gjeld, det er mange som står i faresona. Mister du jobben, er det ikkje like lett om alle pengane er vekke på ferieturar.

– Fleire er blitt late av at vi har hatt det så godt lenge. Vi stikker hovudet i sanden som ein struts når det gjeld økonomien vår, og tenkjer at det er naboen som vil slite, og ikkje oss sjølve. Det er uklokt, seier forbrukarøkonom Silje Sandmæl i DnB.

Det ligg an til å bli eit moderat lønsoppgjer i år, og stadig fleire mistar jobben, eller vert permitterte.

Forventningsbarometeret som kom i førre veke, viser at stadig fleire har negativt syn på norsk økonomi, men god tru på sin eigen økonomi.

• Les også: Sydenferien ble et pengesluk
• Les også: Varsler magre lønnsoppgjør

Sandmæl ber folk lage budsjett

– Det skal vere ille før folk vel vekk ferien sin. Sjølv om vi er inne i ein svært utrygg situasjon, vel folk å reise, seier Sandmæl.

DnB har tidlegare vist at berre ein av fire nordmenn lagar budsjett.

– Det er ikkje sikkert at ferien bør stå på førsteplass over utgiftspostar i sommar. Men det vil du ikkje få oversikt over før du lagar budsjettet. Mange lever litt for mykje i nuet, og prioriterer feil.

Forbrukarøkonom Magne Gundersen i Sparebank 1-gruppa, ber folk tenkje over kvar ferieturen går.

• Les også: Varsler magre lønnsoppgjør
• Les også: – Eldre vil nyte og leve livet

Heller Noreg enn USA

– For dei som er redde for jobben sin, er permitterte eller går usikre tider i møte, er ikkje den store amerikareisa til 150 000 kroner noko ein bør prioritere i år. Då kan ferie i Noreg vere eit godt alternativ. Her er det låg kronekurs mellom anna.

– I USA for eksempel er dollaren sterk, og dermed går det meir pengar mot ei svak krone.

Dei to forbrukarøkonomane er samde om at svært mange nordmenn har eit sunt forhold til eigen økonomi, og at dei fleste har råd til ein ferie.

– Det er viktig at folk brukar pengar, også i nedgangstider. Elles kan det fort bli ein lei runddans der endå meir stoppar opp i samfunnet og fleire mister jobben, seier Gundersen.