Domstolar ber publikum halde seg unna rettssaker

Domstolane har ikkje planar om å stenge sjølv om den pågåande spreiinga av koronaviruset ser ut til å breie om seg.

Måndag la Domstoladministrasjonen ut informasjon om korleis aktørar i domstolane i landet skal ta omsyn til smittefaren.

Onsdag følgde Høgsterett opp med at alle saker vil gå som normalt, men med ei oppfordring til dei som skulle ønske å følgje rettsforhandlingane.

– For å bidra til å redusere arenaer som kan gi grunnlag for stor smittespreiing, oppmodar vi publikum om ikkje å følgje ankeforhandlinga, skriv Høgsterett på Twitter.

Heller ikkje Borgarting lagmannsrett, som er den største ankedomstolen i landet, har planar om å stenge ned drifta på grunn av virusutbrotet.

I staden oppfordrar lagmannsretten, like eins med Høgsterett, publikum til å velje å ikkje kome til rettssalane. Normalt er rettssalane opne for alle som vil følgje pågåande rettssaker.

– Vi beklagar å måtte oppmode til tiltak som avgrensar openheita om sakene, men håper på forståing. Takk for velvilja, skriv lagmannsretten.

Det er ikkje kjent om fleire domstolar vil følgje etter.

Oslo tingrett, som er den travlaste domstolen i landet, hadde onsdag ikkje offentleggjort nokon spesielle tiltak ut over informasjonsskrivet frå Domstoladministrasjonen.