Klar for middag med kongen

– Det er stas, seier Carl Erik Grimstad om å vere invitert til middag hos kongen. Han stiller i splitter ny vestfoldbunad når han møter sine tidlegare arbeidsgjevarar igjen i kveld. No som stortingsrepresentant for Venstre.

– Dei ler litt av meg i stortingsgruppa. For då eg arbeidde på slottet kalla vi den middagen vi skal i no for stortingsmiddagen. Her på Stortinget kallar vi det slottsmiddagen. Det er litt vanskeleg å kople for meg, ler Grimstad.

• LES OGSÅ: Rotevatn trolig ute og Grimstad og Elvestuen inne for Venstre på Stortinget

Kongekritikk

Tidleg på 1990-talet hadde han slottet som sin daglege arbeidsplass. Han starta som sekretær for den gong kronprinsesse Sonja og vart seinare soussjef med ansvar for blant anna kongens taler etter tronskifte i 1991. Så slutta han i jobben ved hoffet og vart landets mest profilerte kongekritikar.

• LES OGSÅ: Å si at vi er åpne er rett og slett feil
• LES OGSÅ: Monarki-krangelen til radioen

Grimstad mana til debatt om monarkiet, kritiserte manglande openheit og meinte majesteten burde gå av med pensjon.

I dag er tonen ein annan. Stortingsmannen Grimstad har lagt monarkidebatten til side og valt helse som si fremste politiske sak.

Endra meining

– Ein gong meinte eg at vi må debattere statsforma og setje republikk på agendaen kvart år. Eg meiner ikkje det i dag, seier han.

Ifølgje Grimstad er monarkidebatten den minst vesentlege politiske debatten å ta i dag. Modernisering av samfunnet er langt viktigare, ifølgje han.

– Eg aktar ikkje å henge meg på SV's kontinuerlege krav om republikk, men eg kan godt diskutere reformer og forholdet mellom kongehuset og statsapparatet, seier han.

Grimstad er blant dei som har teke til orde for at offentleglova også skal gjelde for kongehuset. Eit standpunkt han vil arbeide for også som stortingspolitikar.

Politisk sjølvmord å gå mot kongen

Carl Erik Grimstad har berre vore innom slottet for å helse på gamle kollegaer etter at han slutta for nær 25 år sidan. I kveld møter han kongen og dronninga igjen, tidlegare sjefar han har stor respekt for.

– Sjølve statsforma har bestått prøva. Det kan ikkje vi som politikarar distansere oss frå. Sjå den kjærleiken folk viser til kongen og dronninga og familien elles. Å argumentere mot kongehuset er jo harakiri for ein politikar.

– Ja, for går du mot kongen, blir du ikkje gjenvalt? spør vi.

Grimstad ler godt.

– Nei, eg blir nok ikkje det. Sjølv om det er mange i venstre som vil ha republikk. Dette er nok eit ganske vanskeleg spørsmål i alle parti.

• LES OGSÅ: La kongen sitte

Vestfoldbunad

Med erfaring innanfrå veit Carl Erik Grimstad kva som ventar når han i kveld kjem til slottsmiddag som tingmann. Skikk og bruk og protokoll har han inne. No har han også gallaantrekket klart.

– For 25 år sidan var det ikkje mange menn som hadde bunad på slottet. Eg synest det er veldig fint å bruke bunad på ein kveld som dette, seier han.