Bustadprisane aukar, men det er færre sal

– Til trass for at alle regionar opplevde bustadprisvekst i januar, viser oversikta for dei siste tolv månadene at veksten i dei fleste store byregionar er fallande, seier administrerande direktør Christian Vammervold Dreyer i Eiendom Norge.

I januar vart det seld vel 5.600 bruktbustader, ein nedgang på 13,3 prosent frå januar i fjor. Nedgangen skjer først og fremst i Oslo og Rogaland.

– Hovudårsaka er at det særleg på det sentrale austlandsområdet er få bustader til sal, seier Dreyer.

Han meiner det er behov for tiltak, særleg i Oslo, for å få nok byggeprosjekt ut i marknaden.

Her er hovudpunkta frå Eiendom Norge:

• Bustadprisane i januar 2016 steig nominelt med 3,1 prosent.
• Korrigert for sesongvariasjonar steig bustadprisane med 0,7 prosent
• Bustadprisane dei siste 12 månadene viser ein oppgang på 5,2 prosent
• Alle byar hadde ein prisoppgang i januar. Larvik hadde sterkast utvikling med ein oppgang på 3,8 prosent. Stavanger hadde svakast utvikling med ein oppgang på 2,0 prosent.
• I snitt tar det 47 dagar å selje ein bustad, mot 48 dagar i tilsvarande månad i fjor.

– Eit byks når juleferien er over

Obos har hatt vekst i januar. Deira tal viser ein oppgang på 4,2 prosent frå desember.

– Den kraftigaste veksten kjem ofte dei første månadane av året, og rett før sommaren. Så har det gått noko ned mot slutten av året, for så å gjere eit byks når folk er ferdige med juleferien og ser at dei framleis har jobb, seier kommunikasjonssjef Åge Pettersen i Obos.

• LES: Boligprisene falt i desember
• LES: Flere kausjonerer for barna på boligmarkedet

– Årsaka til at oppgangen er såpass kraftig er at det er færre bustader til sals, då pressar etterspurnaden prisane opp.

Vekst i Stavanger, men byen er ikkje friskmeld

I Stavanger er situasjonen ein ganske annan enn på det sentrale Austlandet. I januar steig prisane med 2,0 prosent frå desember i fjor.

– Det betyr ikkje at marknaden er friskmeldt. Dersom vi sesongkorrigerer resultatet vil den vise ein negativ utvikling i prisane. Tilbodssida er rekordhøg og det er kraftig fall i talet sal. Det gjer at Stavanger vil ha ein negativ utvikling i tida som kjem, seier Dreyer.