370 milliardar dollar, tilsvarande 3.400 milliardar norske kroner, forsvann då Shanghai-indeksen fall heile 8,73 prosent ved opning måndag, skriv Reuters. Fallet var endå større på Shenzen-indeksen, som opna 8,99 prosent i minus.
Stupet på børsane kom som følgje av nyheita om at endå fleire har døydd av Wuhan-viruset.
Måndag svekte yuen seg òg med nesten 1,5 prosent til rundt 7 mot dollaren.
Også andre marknader fall måndag, mellom anna fall børsen i Taiwan 2,8 prosent ved opning. Hang Seng-indeksen i Hongkong starta derimot veka i pluss, 0,17 prosent.
Svak nedgang
Sjølv om dei kinesiske børsane falt bratt måndag, gjer det lite uslag på Oslo Børs.
Måndag morgon opna børsen svakt ned. Etter ti minutts handel hadde hovedinndeksen fall med 0,4 prosent.
I Tokyo fall Nikkei-indeksen 1,64 prosent ved opning, medan den breiare Topix-indeksen fall 1,52 prosent.
Etter at børsane i Tokyo opna, uttalte strateg Yukino Yamada i Daiwa Securities at investorar var forsiktige i frykt for eit potensielt fall i den kinesiske marknaden.
Børsane i Kina har vore feriestengt i over ei veke i samband med feiringa av kinesisk nyttår.
Yukino Yamada påpeika at også amerikanske aksjar fall kraftig fredag, då amerikanske styresmakter forbaud utanlandske statsborgarar som nyleg har vore i Kina, å komme inn i landet. Førre veke erklærte òg Verdshelseorganisasjonen (WHO) internasjonal folkehelsekrise.
Pumpa inn
Samtidig som marknadene opna måndag, pumpar regjeringa i Kina ein sum tilsvarande 1.600 milliardar kroner inn i finanssystemet for å stabilisere økonomien under virusepidemien.
I ei fråsegn frå sentralbanken i landet heitte det søndag at summen skal sikre likviditet i bankstellet og bidra til å stabilisere valutamarknaden.
Stephen Innes frå AxiCorp uttalte søndag at det ikkje er stupet ved opning måndag som vil ha stor tyding, men heller «etterskjelvene».
