Berit Svendsen går av som sjef for Telenor Norge

Etter nesten 30 år i Telenor, går Berit Svendsen av som administrerande direktør for verksemda i Noreg og som sjef for Skandinavia. Det skriv selskapet i ei pressemelding.

På Twitter skriv Svendsen at ho er stolt over å ha bidrege til utviklinga av selskapet, og ønsker kollegaene lykke til vidare.

Ny sjef for verksemda i Noreg blir noverande Asia-sjef i Telenor, Petter-Børre Furberg, opplyser Telenor. Han blei seinast i førre veke peika på som ein mogleg arvtakar for Svendsen. Bjørn Ivar Moen er konstituert fram til Furberg er klar.

Morten Karlsen Sørby er utnemnd til fungerande sjef for Skandinavia.

• Tidslinje: Dette er Telenor-saken

Konflikt i toppleiinga

I august avslørte NRK at det har vore ein langvarig konflikt mellom Svendsen og toppsjefen i Telenor, Sigve Brekke. Og at Brekke sette i gang ein prosess å bytte henne ut. Ho skal blant anna ha fått tilbod om å leie eit dotterselskap av Telenor i Thailand.

Svendsen blei administrerande direktør for Telenor i Noreg i 2011. I 2017 fekk ho også ansvaret for Danmark og Sverige. I tillegg har ho sete i konsernleiinga i selskapet. Då Brekke fekk jobben som toppsjef i 2015, blei Svendsen sett på som den argaste konkurrenten til stillinga.

Bråket skal ha skapt stor uro internt i Telenor, og ekspertar har åtvara mot kva konsekvensar uroa kan få for selskapet.

Fekk tilbod om nye roller

Svendsen skal ha fått tilbod om nye arbeidsoppgåver i Telenor. Blant anna at ho skulle få halde fram som sjef for Skandinavia, og skulle få overta som styreleiar etter Sigve Brekke i Telenor Norge. Dette takka ho nei til.

– Nettopp fordi Berit gjennom sju år har leiar Telenor til gode resultat i Noreg, er ho ei av dei vi har ønskt å satse på for framtida, og eg synest det er svært trist at Berit har valt å takke nei til dei tilboda ho har fått om nye roller i Telenor. Eg oppfattar det slik at konsernsjefen har strokke seg langt for å etterkome ønska hennar, seier styreleiar i Telenor ASA, Gunn Wærsted, i pressemeldinga.

• Les: Eksperter: – Bråket i Telenor skader selskapet
• Les: Telenor-ansatte slår ring om Berit Svendsen

Styreleiaren seier seg også lei for den sterke uroa som har vore i den norske organisasjonen dei siste vekene, og den belastninga det har hatt på medarbeidarane.

Også Brekke seier seg lei for at Svendsen sluttar i Telenor. På Twitter takkar han henne for den innsatsen ho har gjort for konsernet, og ønsker henne lukke til vidare.

– Måtte gå mot si eiga vilje

Bråket i toppleiinga i Telenor har fått mykje merksemd. Grunnen til det er den posisjonen Svendsen har hatt, seier økonomikommentator i NRK, Cecilie Langum Becker.

– Berit Svendsen er ein av dei mest markante kvinnelege næringslivsleiarane i Noreg, som i tillegg sit i konsernleiinga av eitt av dei største børsnoterte selskapa i landet. At ho må ut av konsernleiinga utan at ho ønsker det sjølv, etter det som ser ut som usemje over lengre tid med sin næraste leiar, Sigve Brekke, vekker oppsikt.

I tillegg kjem dette relativt kort etter førre personkonflikt i Telenor-konsernet.

– For to år sidan kom det ut at styreleiar Gunn Wærsted ikkje hadde tillit til Sigve Brekke, men klarte ikkje å fjerne han frå toppleiarstolen. Så at det no er ei ny konflikt som kjem ut i offentlegheita på denne måten er oppsiktsvekkande, seier Becker.

Telenor har kalla inn til pressekonferanse om endringane i leiinga klokka 11, og ønsker ikkje å gi fleire kommentarar før det.

Tidslinje: Berit Svendsen og bråket i Telenor

Det stormer i Telenor for tiden. Tirsdag 4. september ble det kjent at den erfarne Telenor Norge-sjefen Berit Svendsen slutter etter at hun ikke fikk fortsette i stillingen.