Då Karen Finnbakk Susort (8) i slutten av februar var på besøk hos søskenbarnet Emma Linnea Jenssen Finnbakk (8) i Levanger, fekk dei høyre litt om kva som hadde skjedd i Ukraina.
Då dei skulle legge seg, tok dei fram papir og blyant og skreiv:
«Til Jonas Gahr Støre. Vi vil at de skal hjelpe Ukraina, fordi statsministeren i Russland tar så dumme val. Han bryt lovane og er ikkje snill mot Ukraina. Vi vil hjelpe Ukraina, og vi håper at de også kan hjelpe.»
– Vi syntest litt synd i Ukraina, så difor ville vi skrive eit brev. Vi skreiv at vi ville hjelpe så mykje som vi kunne, seier Karen Finnbakk Susort.
Det ferdige brevet viste dei til pappaen til Emma, og bad han om å sende det til statsministeren.
Han tok bilete av brevet og sende e-post.
– Vi hadde litt lyst at han skulle få vite det, seier Karen.
Skru på lyd for å høyre Emma lese opp brevet:
Vil vise støtte
Mange barn er urolege for krigen i Ukraina, og rekordmange vil hjelpe med å samle inn pengar.
Fleire tyr også til blanke ark og fargestiftar, men i motsetnad til under pandemien då dei teikna regnbogar og skreiv «Alt blir bra», treng barna no berre to fargar.
I klasse 3C på Lakkegata skole blir elevane ivrige når dei skal teikne.
– Eg treng berre blå og gul, for det er fargane til det ukrainske flagget. Vi må gjere det litt fint for dei, for det har vore litt tungt for dei å vere i det landet med masse krig, seier Bo Halvorsen Jæger (8).
Fleire av elevane er klare på at dei teiknar med Ukraina sine fargar for å vise støtte, men tre jenter i parallellklassen vil ikkje berre teikne. Dei starta ein klubb og har hatt møte med rektor om å starte ein innsamling av pengar og klede til ukrainarar.
– Vi har tenkt til å hjelpe så mykje vi kan herifrå, seier Ayten Struijk.
Naturleg reaksjon
Marte Gerhardsen er utdanningsdirektør i Oslo seier det viktigaste skulen gjer no er å vere til stades for barna og ungdommane. På fleire skular teiknar elevane flagg.
– Alle elevane, uansett alder, får vite om krigen. Veldig mange elevar sit med veldig sterke inntrykk, og treng å fordøye det. Vi prøver å legge til rette for det, seier Gerhardsen.
Psykologspesialist Ragnhild Holm Løwgren seier det er naturleg for barn å uttrykke seg gjennom leik og teikning.
– Det handlar mykje om fordøying av eigen forståing, og av eigne kjensler og tankar, seier Løwgren.
Ho trur teikning kan hjelpe barn når det gjeld stress og uro. Ho seier det alltid er godt å få gitt uttrykk for korleis ein har det, og vise det til nokon ein stolar på.
– Barn er i ein ganske hjelpelaus situasjon utan noko makt, og dei treng å appellere til dei som har makt og som har moglegheit til å gjere noko.
Ho understrekar at dersom barna plutseleg teiknar veldig mykje krigsrelaterte ting, er det fint om foreldra følger opp og pratar med barna om det slik at dei kan få hjelp til å forstå og handtere inntrykka.
Ho seier at også vaksne kan ha godt av å ikkje berre ta inn nyheitene.
– Kanskje vi også skulle sette oss ned og fordøye det litt, tenke og gi uttrykk for kva vi ynskjer å gjere, og handle på same direkte og fine måte.
Glad for å ha skrive brev
I brevet ville Karen og Emma formidle at dei ville at ukrainarar skulle få hjelp med å kome seg til Noreg eller «nokon andre fine land».
Dei to vil ønske dei velkomen til Noreg.
– Eg hadde ein veldig glad følelse inni meg når eg hadde skrive det brevet, seier Karen.
– Eg er glad for å ha skrive til statsministeren, for kanskje han kan hjelpe Ukraina, seier Emma.
– Gjer det vi kan
Statsminister Jonas Gahr Støre (Ap) skriv i ein e-post til NRK at han synest det er fint at Karen og Emma bryr seg om det som skjer i Ukraina, og at «Noreg gjer det vi kan for å støtte og hjelpe Ukraina».
– Vi vil òg legge press på Russland, saman med andre land i Europa og i NATO, skriv Støre.
Han skriv at det etter kvart vil kome mange flyktningar frå Ukraina til Noreg, og at han møtte nokre av dei førre veke.
– Historiene deira gjorde sterkt inntrykk på meg. No håper eg dei etter kvart blir godt tatt i mot i klasserom og lokalsamfunn rundt omkring i landet, og at vi stiller opp for å hjelpe dei som kjem til Noreg, skriv Støre.
Han har vore på fleire skulebesøk den siste tida, og skriv at han veit at veldig mange barn tenker mykje på krigen og dei uskuldige som blir råka.
– Krigen i Ukraina er vond og kjennest uverkeleg for oss alle, og eg trur dei fleste vaksne deler barna si uro, og har like mange spørsmål om det som skjer, skriv Støre.