Hopp til innhold

Åtvarar om betydeleg snøskredfare i nyttårs-fjellet

Er du ein av dei som har tenkt deg ut på skitur i fjellområda i Sør-Noreg før nyttår, så bør du vere obs på at snøskredfaren vil auke kraftig.

Grasdalen 3

FAREFULLT TERRENG: Skredobservatør Albert Lunde var tysdag i Grasdalen i Stryn. Ein av stadane i fjellheimen der snøskredfaren ofte er tydeleg.

Foto: Albert Lunde

– Snøskred kan losne av seg sjølv med det mildvêret som kjem no.

Det seier vaktleiar i NVE si snøskredvarsling, Tommy Skårholen, til NRK.

Han åtvarar folk på det sterkaste om å legge ut på tur i skredterreng, særleg fordi faren er at snøskreda kan kome naturleg.

Plussgrader langt til fjells

– Torsdag kjem det mildvêr inn over Sør-Noreg Då får vi ein auke i snøskredfare i heile landsdelen, seier Skårholen.

Plussgrader og regn langt til fjells aukar faren frå moderat til betydeleg i fleire område.

I Hallingdal og Jotunheimen kan det kome til å regne heilt opp til 1100–1200 meter over havet.

– Over mildvêrsgrensa blir det ustabil fokksnø, seier NVE sin skredekspert.

Skredekspert Albert Lunde fortel at det er stor snøskredfare fleire stader i fjellet.

Få kjenner fjellheimen i Sør-Noreg like godt som Albert Lunde. No har han rapportert om aukande skredfare til NVE.

Foto: Even Lusæter / NRK

Gir klare råd

Fjellmannen Albert Lunde frå Lom var ute i fjellet seinast i dag for å observere snøskredfaren.

– No er eg ute tre dagar i veka for NVE, fortel Lunde, som også tok bilete som ein kan sjå igjen på varsom.no

Det å gå turar i tøffare terreng enn løypene i Nordmarka, har dei siste åra blitt svært populært.

Difor er NVE også nøye med å gje tydelege råd til dei mindre erfarne som let seg lokke av fjellet.

– Unngå skredterreng når det er fare for at skred kan losne av seg sjølv, seier Tommy Skårholen.

Meir stabilt i nord

Han forklarar at når temperaturen stig og du får regn på snødekket, så blir bindinga i snødekket svekka og skred kan gå av seg sjølv.

Han har ingenting i mot at folk kjem seg ut, men ber folk vere obs no når snøskredfaren aukar.

– Men skal du på skitur no, så må du legge ganske vilje i det, seier skredeksperten.

I Nord-Noreg vil forholda vere meir stabile fram mot helga, men NVE ber folk vere varsame der også.

Lyspunkt

AKTUELT NÅ

SISTE NYTT

Siste meldinger