Arbeidstilsynet: – Vi har fått fleire førespurnader enn normalt

Arbeidstilsynet får årleg førespurnader frå frustrerte tilsette på arbeidsstaden når det er for varmt eller for kaldt på jobb.

• Les: Meteorolog: – Denne sommaren er eit bevis på global oppvarming

I år har dei fått langt fleire førespurnader enn tidlegare.

– Den siste månaden har det vore desidert størst pågang. I desse dagar får vi i snitt ti e-postar og telefonar, noko som er langt meir enn normalt, seier Tommy Gregersen i Arbeidstilsynet.

Både Noreg og Sverige har hatt svært høge temperaturar i sommar. Den offentlege, svenske tenesta 1177 Vårdguiden melder om ei kjempeauke i nettsøk på temaa heteslag, dehydrering og andre varmerelaterte helseplager, skriv NTB.

Tilsette ved Nes sjukeheim i Akershus fortvilar over varmen og er redd for å gjere feil i varmen. Der kan det bli opp mot 35 varmegrader i enkelte rom.

– Vi må konsentrere oss meir, og eg er redd for å gjere feil når det blir så varmt, seier sjukepleiar Tone Holtung Olaussen til NRK.

• Les saka her: 34 grader på sykehjemmet – har ikke aircondition

Ingen lov for temperaturgrense

Det finnast ikkje noko temperaturgrense for kor varmt eller kaldt det skal vere på jobb.

– Ein bør prøve å unngå å jobbe i temperaturar på over 26 grader eller under 19 grader, seier Gregersen.

Arbeidstilsynet skriv på sine nettstader at dei anbefaler å halde temperaturane under 22 grader ved fysisk innearbeid.

Har du opplevd urettferdige arbeidsforhold i sommarvarmen? Ta kontakt med NRK sin journalist her.

Årsaka til at det ikkje er klare forskrifter for temperaturar på jobb, er fordi dei ulike arbeidsgruppene har ulike former for arbeid.

– Om ein til dømes jobbar på eit fryselager seier det seg sjølv at ein ikkje kan jobbe i 22 grader, seier Gregersen.

Arbeidsmiljølova sin § 4–4 syner kva du har rett til på arbeidsstaden.

– Det kan vere farleg

Nestleiar i Fellesforbundet, Steinar Krogstad, fortel til NRK at dei ikkje har fått mange førespurnader denne sommaren.

Mange av medlemmene deira jobbar mykje utandørs, og får som oftast førespurnader under dei kalde vintrane.

Fellesforbundet får likevel spørsmål frå folk som jobbar utandørs i varmen, særleg frå asfaltarbeidarar.

– Dei skal ha synleg tøy, og ny asfalt er svart og veldig varm. Det kan vere farleg å jobbe under slike forhold, sidan ein kan bli dehydrert og ukonsentrerte.

Å jobbe i nærleiken av trafikken gjer at dei må vere ekstra påpasselege når dei blir varme, forklarer Krogstad.

Austlandsområdet tek mest kontakt

Ifølgje Tommy Gregersen i Arbeidstilsynet, er fleirtalet av førespurnadene dei får denne sommaren frå folk som jobbar på Austlandet.

– Vi har fått fleire førespurnader enn normalt, og dei fleste kjem frå Austlandet.

• Les: – Isolert sett er ikke den varme sommeren et bevis på klimaendringer

Det er flest butikkmedarbeidarar som kontaktar Arbeidstilsynet, men ifølgje Gregersen er dei fleste arbeidsgjevarar flinke til å passe sine tilsette.

– Dei fleste arbeidsgivarane legg til rette for sine tilsette og gir dei fleire pausar. Er ein aleine på jobb derimot, kan det vere problematisk, seier Gregersen.

NRK fortalde tidlegare i sommar om Ghadri Gabriella Amairi frå Bergen som stod på jobb i over tretti grader.

• Les saka her: Kan man gå hjem fra jobb viss gradestokken viser over 30 grader?

I dag kan det bli årets varmaste dag fleire stader i landet. Følg emneknaggen vår #nrksvett for å sjå kor varmt det vert i dag!