Torsdag ettermiddag vart skipet som skal reise til kysten av Italia, presentert i Bergen.
Forsyningsskipet «Siem Pilot» er nesten 90 meter langt og 20 meter breitt. Fartøyet er bygd i 2010 ved verftet Eidsvik skipsbyggeri i Uskedalen i Hordaland.
Etter det NRK forstår, var det i går ettermiddag at det vart bestemt at det er dette skipet som skal sendast. «Siem Pilot» er eit forsynsningsfartøy som også er konstruert for redningsoppdrag i Nordsjøen.
Skipet tar 500 menneske
Norske styresmakter har blitt bedne om å stille med skip frå 1. august for å hjelpe til med å handtere flyktningkrisen. Regjeringa har gitt Politidirektoratet ansvar for oppdraget, og innsatspersonell frå politiet skal ha med seg våpen om bord.
- LES OGSÅ:
Etter det NRK kjenner til, reiser skipet allereie i mai. Dette kunne statsministeren stadfeste då ho viste fram skipet i Bergen torsdag ettermiddag. Det tek mellom ti og 14 dagar å seile frå Noreg til Italia.
Totalt kom det inn 48 tilbod om skip i anbodsrunden. «Siem Pilot» kan ta om bord fleire enn 500 menneske, og var det som var best eigna, ifølgje statsministeren.
Væpna politi om bord
Detaljane rundt oppdraget er førebels ikkje avklart, men mest truleg får det norske bidraget tildelt eit operasjonsområde sørvest, sør og søraust av Sicilia.
– Det som er spesielt med dette oppdraget, er at det vil omfatte redning av flyktningar i havsnød og i mange å tilfelle hente opp døde frå sjøen, seier seksjonssjef John Ståle Stamnes i Politidirektoratet.
Følgjande mannskap skal vere om bord i det norske fartøyet:
- Åtte innsatspersonell med politiutdanning (ein styrkeleiar, ein nestleiar, fire maritime politipersonell og to rapporteringspersonell)
- Om lag 15 skipspersonell (norsk skipsførar)
- Om lag ti forsvarspersonell gjennom Kystvakta (ein kystvaktleiar, tre båtførarar, to redningsmenn, samt fire sanitetspersonell og lege)
- Italiensk sambandsoffiser
I tillegg søkjer Politidirektoratet etter ein norsk politiliason som skal arbeide i det internasjonale koordineringssenteret (ICC) i Roma. Det norske bidraget blir ein del av operasjonen «Triton» i regi av det europeiske grensekontrollbyrået Frontex.