Til ståande applaus sette ho kursen mot talarstolen, og vende blikket mot 315 fagforeiningsfeller på Folkets Hus i Oslo.
Gerd Kristiansen snakka i hovudsak om to ting; å få dei blå ut. Og å få Arbeidarpartiet inn.
Gull til dei rike, gråstein til arbeidsfolk
På hennar vakt har oljeprisen stupt og arbeidsløysa stige. Men LO-leiaren meiner regjeringa må ta skulda for at fleire er utan jobb.
– Folkens, eg kan nesten ikkje vente til 12. september når landet har fått eit nytt fleirtal. Dei store pengane i Noreg i dag vert brukt på å gje gull til dei som allereie har gull, og gråstein til vanlege arbeidsfolk, seier Kristiansen.
– Vi kan skape titusenvis av arbeidsplassar om vi prioriterer tiltak og aktivitet framfor å stue vekk pengar hjå Stein Erik Hagen. Dette veit regjeringa. Det er politikken deira. Det er det motsette av kva landet vårt treng.
Uting og snikksnakk
Regjeringa har mjuka opp arbeidsmiljølova og opna for meir bruk av mellombelse tilsetjingar.
Målet er å få fleire ut i arbeidslivet. Men Ap-leiar Jonas Gahr Støre går til val på å reversere oppmjukinga.
– Lat oss slå det fast ein gong for alle. Midlertidige tilsetjingar er ein uting. Regelen i norsk arbeidsliv skal vere faste tilsetjingar. Vi i LO står for ein tydeleg alternativ politikk. Enkle men effektive løysingar. Ikkje så mykje snikksnakk, slo Kristiansen fast.
LES OGSÅ:
– Midlertidige tilsetjingar er eit godt verkemiddel
Stefan Heggelund er medlem av arbeids- og sosialkomiteen på Stortinget (H).
Stefan Heggelund (H) understrekar at hovudregelen framleis er faste tilsetjingar i arbeidslivet. Men han får tilbakemeldingar særskilt frå unge arbeidstakarar om at eit vikariat kan vere eit godt verkemiddel.
– Eg synes ikkje det er ein uting å senke terskelen i arbeidslivet. For nokon står valet mellom å ha ein midlertidig jobb og å ikkje ha jobb i det heile teke. Endringane i arbeidsmiljølova sørger for å få fleire inn i arbeidslivet, seier Heggelund.
Siterte Severin Suveren
Torsdag takkar Kristiansen for seg etter fire år i LO-førarsetet.
Hans Christian Gabrielsen tek over eit LO med vel 910 000 medlemmar. Kristiansen avslutta talen i dag med å sitere fjellvettreglane.
– Kjære regjering. De har pengar, så bruk dei rett. Revidert nasjonalbudsjett kjem om få dagar. Hugs Severin Suveren; det er ingen skam å snu. Eller, som eg tenkjer av og til; de kan grave dykk ned i tide, sa Kristiansen.
