– Me har flytta sparepengane våre til grønare investeringar, no bør Oljefondet gjere det same, seier gjengen frå «Besteforeldrenes klimaaksjon».
Besteforeldre investerer i grøn framtid
NRK møter pensjonistane på Kaffistova i Oslo sentrum. Der planlegg dei mellom anna si deltaking på dagens Divestment-day, ei global markering, der organisasjonar oppmodar selskap, fond og privatpersonar til å gjere grøne investeringar.
Dei fem pensjonistane er delaktige i Besteforeldreaksjonen. Dei har flytta pengane over til berekraftige fond, og vil at oljefondet gjer det same. Frå venstre: Finn Bjørnar Lund, Kristin Aspelund, Ivar Castberg, Christian F. Holst og Gustav Paulsen.
Foto: Line Tomter / NRK«Besteforeldrenes klimaaksjon» er ein av 20 organisasjonar i Noreg som stiller seg bak aksjonen. Dei meiner mellom anna at det norske oljefondet må sjå mot grøne investeringar, i staden for å investere i selskap som kan bidra til klimaendringar.
– Eg hadde pengar i Statoil, men dei er no selt, seier Gustav Paulsen, som bur i oljebyen Stavanger.
– Det handlar også om kva bank ein set pengane sine i. Eg har gått over til Storebrand, sidan dei var dei første til å trekke seg ut av kol. Eg vil jo ikkje ha pengane mine i selskap som ikkje har noko klar meining om dei skal investere i det grøne eller svarte, seier Ivar Castberg.
- LES OGSÅ:
Christine Meisingset i Storebrand seier ho merkar at kundane vert stadig meir opptekne av å gjere grøne investeringar.
Foto: Storebrand– Kundane er stadig meir opptekne av berekraft
Dei to pensjonistane prøver å prioritere dei grøne alternativa, og skal ein tru investeringsekspertane, så er dei ikkje åleine om å tenkje slik.
– Me merker at kundane er stadig meir opptekne av berekraft når dei skal investere i fond. Og det har me sette in tydeleg endring på dei siste par åra i både Noreg og Sverige, seier Christine Meisingseth.
Ho meiner det i dag vert stadig meir økonomisk gunstig å ta etiske investeringsval, og det auka fokuset på berekraft har minska risikoen for grøne investeringar, meiner Meisingseth.
– Trenden ved å investere i grøne fond har forsterka seg i Noreg det siste året, og debatten har endra seg meir mot kva som er finansielt relevant, og ikkje berre etisk.
Dag Arne Kristiansen er direktør for samfunnsansvar i DnB Nor, og merkar ei stor auke i grøne fondsinvesteringar.
Foto: NRK– Mogleg å spare, og samstundes bidra godt
Også i DNB har dei lagt merke til at stadig fleire oppdagar dei finansielle fordelane med å investere grønt.
– Me trur det ligg moglegheiter i den grøne økonomien, og at det er mogleg å spare, samstundes som ein bidreg godt, seier direktør for samfunnsansvar i DnB Nor, Dag Arne Kristensen.
Nyleg har både oljefondet trekt seg ut av selskap som bidreg til store klimagassutslepp, hovudsakleg av økonomiske grunner og ikkje først og fremst etikk. Og i november kasta pensjonsfondet KLP fleire kolselskap ut av sin portefølje.
