Medan nokre institutt og høgskolar samarbeider med arbeidslivet og tilbyr studentane sine mange vekers praksis i løpet av studietida, går andre gjennom heile studiet utan kontakt med arbeidslivet. Det meiner Skogen Lund er beklageleg.
– Dei aller fleste kandidatar frå høgare utdanning skal ut i ein arbeidsmarknad utanfor akademia. Høgare utdanning må derfor vere tett kopla på arbeidslivet, seier NHO-direktøren til NRK.
Lovprisar praksisopphaldet
Kari Ranheim Lome er ein av dei som har vore ute i praksis som ein del av studiet, og Valdres-jenta ho lovprisar opphaldet utanfor Blindern, mellom anna i den norske FN-delegasjonen i New York
– Eg kom til ein veldig hyggeleg stad som eg fann ut at eg hadde veldig lyst å jobbe hos seinare, så det var fint å treffe blink. Men det er også generelt viktig å læra om arbeidslivet og kva som finst der ute, noko som ofte er vanskeleg å vita for ein bachelorstudent.
Slik ønskjer Skogen Lund at alle skal ha det. Og det er ikkje så viktig å hamna ein stad der ein skal vera for alltid i arbeidslivet, meiner ho.
– Eg trur det er viktig for studentane å ha tett kontakt med arbeidslivet, for ting endrar seg fort. Og når du kan bruka det du lærer i praksis, då lærer du endå betre, meiner ho.
- Les også:
- Les også:
Får betre studentar av arbeidspraksis
Prorektor Gro Bjørnerud Mo ved Universitetet i Oslo er også positiv til utspelet frå NHO.
– Dette bli ikkje eit brot i utdanninga, tvert i mot vil kvaliteten på studentane bli høgare etter eit opphald i arbeidslivet, seier ho.
Joakim Ebeltoft studerer psykolog, og har ikkje arbeidspraksis i studiet. Han tok saka i eigne hender, og har saman med ein medstudent sett i gang undervisning i psykisk helse i ungdomsskolen.
– Ja, vi meiner det er for lite om psykisk helse i skolen, men skulle gjerne hatt universitetet med på dette.
Treng øving i arbeid
Han blir glad nå han høyrer at NHO og Universitetet er samde om å senda langt fleire studentar ut i praksis i arbeidslivet.
– Det er eg heilt samd i. Studentar er ein resurs som bør brukast meir, og vi er framtidas arbeidstakarar som treng øving i det vi skal driva med, seier han.
Kunnskapsminister Torbjørn Røe Isaksen trur ikkje det er mogeleg å sende alle studentar ut i praksis. Han er samd i at studentar bør få praksisplass, men trur det vil vere vanskeleg å få for alle.
– Eg trur ikkje det er nokon god ide å berre lovpålegge alle universitet og høgskolar å gjere dette, for da må vi også lovpålegge alle bedrifter å ta i mot studentar. Dette må gjerast gjennom samarbeid, seier kunnskapsministeren.