Live Kleveland i Dyrevernalliansen varsla for eitt år sidan Riksadvokaten om at rettspraksis i dyremishandlingssaker ikkje er i tråd med det straffenivået Stortinget har signalisert at ein skal leggja seg på.
Foto: Arne Vatnøy / NRKKvart år kjem det fleire alvorlege dyremishandlingssaker opp for norske domstolar. Ofte mistar dei skuldige retten til å ha dyr, må betala bøter eller får 1–2 månader fengselsstraff på vilkår.
Trass i at det er heile 13 år sidan Stortinget skjerpa øvre strafferamme i grove dyremishandlingssaker frå eitt til tre års fengsel, er det framleis ingen dyremishandlarar som har fått strengaste straff.
– Vilkåra som Stortinget har stilt for bruk av straff er rett og slett ikkje teke i bruk av påtalemakta og domstolen. Det er alvorleg, seier Live Kleveland i Dyrevernalliansen til NRK.
Torsdag starta rettssaka mot mannen som kan bli den første til å få tre års fengsel for grove brot på dyrevelferdslova.
– Lucas-saka er spesiell
Aktor Morten Lundén seier at påtalemakta ser alvorleg på saka, og kjem truleg til å leggja ned påstand om fengselsstraff utan vilkår.
Foto: Kathrine Brønn / NRKEin mann i 20-åra frå Moss er tiltalt for å ha avliva hunden sin på ein måte som ifølgje påtalemakta medførte «unødvendig dødsangst og store smerter».
Mannen har innrømt at han i juli i fjor batt fast hunden sin Lucas til eit betongrøyr, kasta hunden frå 6,5 meter og ned i ein innsjø slik at den blei trekt ned mot botnen og drukna.
Lucas-saka er no blitt det Kleveland kallar ei symbolsak. Det er fordi den kjem i kjølvatnet av at Dyrevernalliansen for eit drygt år sidan gjorde riksadvokaten merksam på at rettspraksis i dyrevelferdssaker ikkje er i tråd med det straffenivået som Stortinget har ønska.
– Riksadvokaten reagerte sporenstreks med å senda ut brev til statsadvokatane om at straffenivået skal opp. Me ventar difor spente på resultatet i Lucas-saka. Me bør sjå at det blir teke i bruk høgare straffar både i denne og i framtidige saker, seier Kleveland.
Riksadvokaten stadfestar at dei har gitt klar beskjed til statsadvokatane om å ta denne saka på alvor.
– Me har understreka viktigheita av at strafferamma reflekterer dei politiske signala. Kompetansekrav, prioriteringar og straffenivået må følgjast opp nøye, seier Reidar Bruusgaard, førstestatsadvokat hos Riksadvokaten.
Saka går over to dagar i Moss tingrett og fredag blir det klart om påtalemakta legg ned påstand om tre års fengsel. Aktor har varsla at han vil leggja ned påstand om fengsel utan vilkår.
