- Ho har handsama både opsjonsbråket og skattesaka på ein dårleg måte, meiner merkevareekspert Christian Sinding i Brand Consulting.
Les også:
Cecilie Ditlev-Simonsen innrømma i dag å ha unndrege ei arv på 750.000 kroner frå skatt i 1991.
Ho opplyste samstundes at ho tar permisjon frå jobben som kommunikasjonsdirektør i Hydro, der ho mellom anna har ansvar for merkevarebyggjing.
- Utsett for nok skyts
Sinding meiner Ditlev-Simonsen burde gått til Hydro med skattesaka for lenge sidan, og deretter gått ut i full offentlegheit, slik at ho sjølv hadde kome på bana.
- Hydro har vore utsett for nok skyts, og treng ikkje meir dårleg PR. Cecilie Ditlev-Simonsen var ein del av opsjonsgruppa, og svarte på kritikken med ingen kommentar, seier han.
- Eit par veker seinare kjem denne skattesaka opp, som ho har visst om lenge. Og ho svarar på same måte, kritserer Sinding.
Skeptisk til omdømmebyggjing
Sinding er skeptisk til om Hydro kan leve med å ha Ditlev-Simonsen i leiinga si.
Han er også skeptisk til at ho skal vere med å byggje opp Hydro sitt omdømme.
-Dyktig medarbeidar
Cecilie Ditlev-Simonsen har søkt og fått innvilga velferdspermisjon frå stillinga si som kommunikasjonsdirektør i Hydro.
Personaldirektør i Hydro, Anne Harris, tykkjer det er beklageleg situasjon kollegaen hennar er komen opp i.
- Cecilie er ein svært dyktig medarbeidar og vi er leie oss for den situasjonen ho er komen opp i. Vi er sjølvsagt opptekne av at alle våre tilsette har orden i sine forhold til styresmaktene og tar difor til etterretning at Cecilie i dag har tatt kontakt med skattestyresmaktene for å ordne opp i saka, seier Harris.
Pengar i sveitsisk bank
Cecilie Ditlev-Simonsen er dotter av Oslo-ordførar Per Ditlev-Simonsen, som har hatt pengar på ein konto i Sveits utan å informere norske styresmakter om dette.
Les også:
Også ordføraren sin son, Sverre Ditlev-Simonsen innrømmer å ha unndrege 750.000 kroner frå skatt.
Pengane var arv frå mora som døydde i 1990.
- Pengane kom så vidt eg veit frå hennar far og sto på ein konto i ein sveitsisk bank. Beløpet vart sett inn på ein konto oppretta i same bank i mitt namn, uttalar Cecilie Ditlev-Simonsen i ei pressemelding.
Orsakar sterkt
Beløpet vart ikkje innrapportert til norske skattestyresmakter slik det burde ha vore. Ditlev-Simonsen orsakar dette sterkt.
Både Cecilie Ditlev-Simonsen og broren orsakar dette, og dei aktar å gå i dialog med styresmaktene for å rydde opp i forholdet.
- Situasjonen som har oppstått dei siste dagane, og den merksemda som er rundt saka, er ei betydeleg belasting for mine næraste og meg, seier Cecilie Ditlev-Simonsen.
Pengane er oppbrukte
Ho opplyser at alle pengane er blitt brukte i utlandet eller tatt heim under hennar første ekteskap på midten av 1990-talet.
- Eg hadde ingen midlar i banken ved inngåelsen av mitt andre ekteskap, i februar 2002, seier ho. Ho uttalar også at ho i dag ikkje har midlar utanfor Noreg.
Broren seier også at pengane er brukt opp og at han i dag ikkje har midlar utanfor Noreg som ikkje er oppgjevne til norske skattestyresmakter.