Kyrkjeminister Trond Giske kommenterer no kyrkjestriden som har rast for fullt i media den siste veka. Etter at eit mannleg par inngjekk partnarskap i våpenhuset i Kampen kirke i Oslo, har bølgjene gått høgt.
Oslo-biskop Ole Christian Kvarme prøvde å stoppe seremonien ettersom kyrkja har eit regelverk som forbyr kyrkjelege handlingar som liknar på vigslar for homofile par.
Gard Realf Nilsen og Lasse Sandaker inngjekk partnarskap i våpenhuset i Kampen kirke i Oslo fredag
Foto: Frode Wik / NRKJustisminister Knut Storberget meinte biskopen skapte grunnlag for hatvold mot homofile. Og kyrkja kritiserte Storberget for å blande seg i indre-kyrkjelege spørsmål.
Vil ikkje presse
No prøver Aps kyrkjeminister Trond Giske å roe dei som fryktar at Regjeringa prøvar å presse gjennom homoliberale reformar i Den norske kyrkja.
- Regjeringa har sagt heilt tydeleg at det som skjer i trussamfunna er opp til dei. Ein liturgi for vigslar for homofile er det Kyrkjemøtet som rår over. Det er ingen som har planar om å ta retten til å bestemme kyrkjelege liturgiar frå kyrkja.
Vil ha politisk engasjement
Samstundes er Giske tydeleg på at han ønskjer at politikarar engasjerer seg innanfor kyrkja i dette spørsmålet.
- Vil du jobbe for at kyrkja skal få vigselsritual for homofile par?
- Som kyrkjeminister meiner eg at det skal kyrkja sjølv avgjere, difor skal eg vere forsiktig med å kaste meg inn i den debatten. Men at andre politikarar engasjerer seg synest eg er legitimt og bra.
- Bør Arbeidarpartiet jobbe for det?
- Det må landsmøtet vedta. Dei fleste medlemmane i Ap er medlemmar i Den norske kyrkja, og sånn sett har vi også der høve til å engasjere oss i kyrkjeval og vedtaks-systema. Det håpar eg mange vil gjere når vi no får ei demokratireform i kyrkja.
