– Dette er kanskje den mest alvorlege saka eg har handtert som statsadvokat i Nordland, seier Thor Erik Høiskar.
Den tiltalte, ein mann i 40-åra frå Helgeland, skal møte i retten 27. mars, og risikerer opp mot 21 år i fengsel.
Han er blant anna tiltalt for å ha dopa og valdteke si eiga dotter, for produksjon og deling av overgrepsbilete av born og for seksuelt overgrep på ein hund.
– Han risikerer sjølvsagt ei veldig lang straff, seier statsadvokaten.
Fleire lovbrot
Tiltalen er teken ut av Statsadvokatane i Nordland, og mannen er tiltalt for ei rekke forskjellige lovbrot.
Strafferamma på overgrepa mot dottera er på inntil 21 år i fengsel.
Mannen skal møte i Rana tingrett 27. mars, og det er sett av seks dagar til saka.
– Det tek lang tid å gå gjennom bevisa, me har mellom anna fleire tusen bilete, difor treng retten god tid, seier statsadvokat Høiskar.
- Les også:
Kan vere knytt til Dark Room
I fjor haust omtalte fleire media politiet sin «aksjon Dark Room». Det var ei storstilt avsløring av eit pedofilinettverk, der politiet rulla opp ei sak mot over 50 menn i alle aldrar og samfunnslag.
Helgelendingen var ikkje ein av dei 51 mennene i saka som blei rulla opp i haust, men kan likevel ha vore knytt til saka.
– Har denne tiltalen noko å gjere med operasjon Dark Room?
– Denne saka er svært lik Dark Room-sakene, svarar Høiskar.
– Men den er ikkje direkte knytt til operasjonen?
– Ja, den er i alle fall i grenseland til å vere tilknytt, seier statsadvokaten.
- Les også:
Har sete lenge i varetekt
Mannen blei arrestert i april i fjor ein annan stad i landet. Han har sete i varetekt sidan då, i over elleve månadar. Ifølgje forsvarar tek mannen dette særs tungt.
– Han er langt heimanfrå, og det er ei alvorleg sak. For han er dette ei rein tragedie, sa forsvarsadvokat Erik Lea til NRK i fjor haust.
Mannen har sete varetektsfengsla, utan å vere dømt for noko, i snart eitt år. Politiet har lov til å halde ein person varetektsfengsla om dei fryktar for mellom anna tryggleiken til vitne eller bevismateriale. Sjølv om etterforskinga er ferdig i distriktet mannen sit i, blei han framleis halden i varetekt.
– I slike alvorlege saker er det viktig at bevis ikkje vert forstyrra. Difor ser me det som rett å halde han i varetekt, seier aktor i saka, Thor Erik Høiskar.
I Noreg er det inga grense for kor lenge ein person kan haldast i varetekt. Internasjonale menneskerettar seier at saker skal opp for retten etter «rimeleg tid», men dette er ikkje definert nokon stad.
- Les også: