NRK Meny
Normal

– Eg tenkte «wow, me er verkeleg ikkje så ulike kvarandre»

Fredag vart om lag 70 soldatar heidra med tenestemedalje i Oslo. Visekorporal Anders Johan Tobiassen fortel at tida i Nord-Irak var ei utruleg oppleving.

Anders Johan Tobiassen og ein kurdisk soldat

GODE VENSKAP: Visekorporal Anders Johan Tobiassen fortel om band knytt på tvers av språkbarrierar.

Foto: Anders Johan Tobiassen / Privat

– Ein skulle tru kulturforskjellen var mykje større, men eg kunne sjå meg sjølv att i mykje.

Visekorporal Tobiassen frå Straumsjøen i Nordland er no heime i Noreg, men dei siste fire månadane var han i Nord-Irak og trena kurdiske soldatar som kjempa mot terrorgruppa ISIL.

Blei heidra med medaljeseremoni

Fredag blei Tobiassen og vel 70 andre soldatar heidra i Gamle Logen i Oslo med tenestemedalje. Generalløytnant Rune Jakobsen delte ut medaljane, og forsvarsminister Ine Eriksen Søreide gratulerte sjølv soldatane.

Medaljeseremoni

STORSTILT BESØK: Generalløytnant Rune Jakobsen delte ut Forsvaret sin operasjonsmedalje Irak. Forsvarsministeren gratulerte soldatane.

Foto: Torbjørn Kjosvold / Forsvaret

– Det er kjekt å bli heidra på denne måten. Spesielt artig er det når veteranar tek seg tid til å komme og gjere litt stas på oss, seier Tobiassen.

Dei soldatane som blei medaljerte no har trent opp om lag 1 500 kurdiske soldatar i kampen mot ISIL, skriv Forsvaret i ei pressemelding.

– De representerer Noreg på ein utruleg god måte, og de har levert eit viktig bidrag til kampen mot ISIL, sa statsråden.

Støtte på språkproblem

– Mitt lag reiste rundt i Kurdistan og trena kurdarane der dei var, fortel Tobiassen.

Tobiassen på trening i Nord-Irak

KROPPSSPRÅK: Tobiassen fortel at mykje kommunikasjon gjekk på kroppsspråk, her på trening utanfor Kirkuk.

Foto: Anders Johan Tobiassen / Privat

I grupper på åtte reiste dei over heile Nord-Irak, og var ettertrakta av kurdarane, men dei møtte nokre utfordringar ved å reise så mykje.

– Nokre gonger møtte ikkje tolken oss då me skulle trene, og me måtte gå etter kroppsspråk og miming.

– Men det er utruleg kor langt ein kjem med litt galgenhumor og kroppsspråk, ler visekorporalen.

– Dei var heilt fantastiske folk

– Eg tenkte "wow, me er verkeleg ikkje så ulike kvarandre", seier Tobiassen.

Dei norske reglane er at under trening, skal norske styrkar gjere nett det same som dei dei trenar.

– Når ein trenar i lag, et saman og ber på likt utstyr kjem ein liksom i prat om heilt vanlege ting, fortel soldaten.

– Ein skulle tru kulturforskjellen var mykje større, men ein kunne sjå seg sjølv att i mykje av det dei gjorde.

Kurdiske soldatar får opplæring

OPPLÆRING: Norske og Nederlandske soldatar gjev kurdarar opplæring i bruk av nye køyretøy.

Foto: Anders Johan Tobiassen / Privat

Mindre enn ei mil frå frontlinja

Sjølv om dei norske soldatane som dreiv opplæring aldri var i strid, var dei nær kampane.

– Me kunne høyre flya til amerikanarane innimellom, men me var aldri nær kampane, seier Tobiassen.

Likevel var nordmennene saman med soldatar som kom frå frontlinjene.

– Eg tenkte no på det. Eg fekk høyre mange triste historier og lagnadar, men det er diverre slik røynda er. Det er jo nettopp difor me er der, for å hjelpe desse menneska, seier visekorporalen.

– Verda er verkeleg ikkje slik som me har det heime i Noreg, Irak vart liksom ei påminning om dette, fortel Tobiassen.

– Det som hjelpte meg var tanken på at om eg klarte å lære desse noko, hjelpte det dei kanskje å komme trygt heim etter neste oppdrag.

Anders Johan Tobiassen, visekorporal
Frontlinja er berre åtte kilometer vekke

ÅTTE KILOMETER UNNA: ISIL sette fyr på oljebrønnar for å hindre sikta til amerikanske og russiske fly- og droneangrep. Den svarte røyken la seg utover ørkenen i Nord-Irak.

Foto: Anders Johan Tobiassen / Privat

– Men eg har mange fleire gode minner enn dårlege, for å sei det slik, smiler Tobiassen

Kulturforskjellar som humor

– Heime i Noreg er me ikkje så vande med å halde hender, men når ein blei god ven med kurdarane, var det vanleg å halde hender og leie kvarandre, seier Tobiassen.

Sentral-Asiatiske land som Irak og Afghanistan har andre måtar å syne venleik på, og fysisk kontakt med vener er mykje viktigare enn i tradisjonell norsk kultur.

– Det var enkelte som tykte det var ganske flaut, ler Tobiassen.

Han fortel at dei gode stundene meir enn veg opp for dei triste historiene nokre av kurdarane hadde.

– Det eg ser attende på, er kameratskapet og alle me blei kjend med.

Tobiasson ser ut over Arbil

Anders Johan Tobiassen ser ut over Erbil, hovudstaden i det Irakiske Kurdistan.

Foto: Anders Johan Tobiassen / Privat

– Eg håpar verkeleg det ikkje vert lenge til neste gong

Anders Johan Tobiassen, visekorporal

Video

Distriktsnyheter fra Nordland. TV
I tredje episode av Stortvildet må Erna Solberg tegne Jonas Gahr Støre. KrF må debattere som SV og motsatt. Hvem vinner debatten?
 Er Jonas Gahr Støre (Ap) god på seksualundervising? Se episode 2 av Stortvildet.