15. april går fristen ut for å søkje om studieplass innan høgare utdanning i Noreg. Er du interessert i å studere i Nordland, då har du bra moglegheiter til å oppfylt ynskjer ditt.
– Dei aller fleste studiane er opne, i den forstand at dei ikkje har veldig god søking, seier rektor Pål Pedersen ved Høgskolen i Bodø.
Tal frå Samordna Opptak viser at ved hovudopptaket i fjor tok Universitetet i Oslo sju av ti topplasseringar på rangeringa over dei vanskelegaste studiane å komme inn på i Noreg. Samtidig må ein langt ned på lista for å finne studium frå høgskulene i Nordland.
Først på 279. plass ligg Politihøgskolen i Bodø, medan journalistikkstudiet ved Høgskolen i Bodø er neste på 364. plass. (Sjå tabell nedst i artikkelen.)
Profesjonsstudiar vinn
Oversikten viser at studium som fører til eit klart definert yrke er mest populære. Krava var i haust hardast til studium av medisin, odontologi, psykologi og ernæring.
I følgje Nettavisen fekk medisinstudiet ved Universitetet i Oslo 1878 kvalifiserte søkarar til 105 plassar til studiestarten i fjor haust. Kun 5,6 prosent av søkarane kom inn. Ved Høgskolen i Narvik reknar opptaksansvarleg Inger Karlsen med at dei fleste får ynskjer sitt oppfylt.
– Alle ingeniørstudia, med unntak av ved NTNU, er opne studier. Då tar vi inn alle kvalifiserte. Dei siste ti åra ikkje har det vore den heilt store søkinga. Men no byrjar det å snu seg litt, seier ho.
Sjukepleiarstudiet i Narvik, kor kapasiteten er avgrensa til 45 plassar, og enkelte masteremner er så populære at ikkje alle får plass her. Men sjølv studium som satelitteknologi, som i Noreg kun er tilgjengeleg i Narvik, har ledige plassar.
– Det har nok litt med at folk er usikre på kva slags jobb dei kan få etterpå, seier Karlsen.
God søking til masterstudium
Sjølv om Høgskolen i Bodø kjem langt ned på lista, meiner ikkje rektor Pedersen at det viser at høgskulen er mindre populær.
– Vi har til dømes god søking på masterstudium, kor vi lett fyller opp. Men dei har lokalt opptak og er difor vanskeleg å samanlikne med studia frå oversikten til Samordna Opptak, seier Pedersen.
Vil ha universitet
Seinare i år skal Nasjonalt organ for kvalitet i utdanningen (Nokut) ta stilling til ein søknad frå Høgskolen i Bodø om å få universitetstatus. Pedersen meiner ein slik status vil kunne gi utdanning i Nordland eit stort løft.
– Eg trur det vil ha litt status å kunne bruke ordet universitet i namnet. Det vil signalisere at vi er på fagleg høgde med dei andre studiestadene i landet, seier Pedersen.
Planane om universitet i Bodø har også blitt møtt med kritikk. Noreg har i dag sju universitet, men fleire høgskuler har planar om å søkje om universitetsstatus. Pedersen er likevel ikkje redd for at omgrepet universitet skal bli utvatna.
– Det blir stilt strenge krav til kvalitet, så det er ikkje sånn at vi berre kan ta namnet utan ei kvalitetssikring først. Dessutan blir vi ikkje eit breddeuniversitet, men får eit regionalt fotfeste med ein annan fagprofil. Eit universitet i Bodø vil komplementare tilbodet som er elles i landet, seier Pedersen.