Kulturkvartalet skal byggjast ut med nytt kulturhus og nytt bibliotek- til saman vil dette koste nærare ein milliard kroner.
Dei har holdt fleire arkitektkonkurransar og ein eigen jury har einstemmig gått inn for eit arkitektforslag som har fått namnet "Urbane Figurer".
Og allereie før avgjersla vart teken låg det an til eit einstemmig vedtak i bystyret. Forslaget vart debattert grundig før dei tok avgjersla.
Bystyret vedtok også nokre endringsforslag både på fasaden, og innvendig i bygga.
Video: Enstemmig vedtatt
Fremja forslag om utsetjing
Svein Olsen frå partiet Rødt fremja idag eit forslag om utsetjing. Han vil gjerne ha fleire forslag på bordet.
- Eg vil gjerne ha fleire forslag på bordet. No har me fått eitt forslag frå juryen. Dei andre forslaga er plassert på sidelinja og me har ikkje fått vurdert dei, seier Olsen.
Han meiner dei minst burde hatt to andre forslag i tillegg til dette eine.
- Det skal skje så mange endringar både innvendig og utvendig. Eg tykkjer me burde fått moglegheita til å vurdere funksjonaliteten til to andre bygg, seier Olsen.
Men han understrekar at det ikkje er snakk om mistillit til juryen.
- Me er lekfolk, og burde difor fått meir enn to bygningar å forholde oss til, seier Olsen.
- Eg tykkjer me treng ein intensiv tenkepause fram til sommaren, og i den tida kunne me vurdert to andre forslag. På den måten ville bystyret ha eit mykje betre grunnlag for å fatte ei avgjersle, seier han.
