Frå laurdag er det forbode å brenne bål

– No forsvinn snøen mange stadar, og sola varmar godt. Med litt vind er det perfekte forhold for ein brann.

Tor Erik Skaar er informasjonsrådgjevar hjå Norsk Brannvernforeining. Han understrekar at det ikkje er ei tilråding.

– Det er eit forbod. Det er klart at vêr og temperatur varierer mellom Kirkenes og Kristiansand, men lova gjeld likevel, seier Skaar.

I fjor blei bålforbodet noko mindre strengt. Til då var det eit totalforbod. I dag gjeld regelen "i eller i nærleiken av skog og annan utmark". Det tyder at ein kan gjere opp eld i opne område, spesielt om det er snødekke.

– Brannvesenet har lokal myndigheit til å utvide forbodet om dei ser det trengst, seier Skaar.

• Les lova her: Forskrift om brannførebyggjing

Ikkje trygt om vinteren

– Ein skal ikkje ta lett på at brannar kan spreie seg, også på vinterstid, seier Skaar.

I januar i 2014 førte ein lyngbrann til at 64 bygningar brann ned i Flatanger i Nord-Trøndelag. Same månad herja ein brann i Lærdal sentrum, og 17 heimar brann og nær 700 menneske blei evakuert.

• Les også: - Ikke uvanlig med brann vinterstid

– Det viktigaste er at ein har hovudet med seg, og brukar sunn fornuft, seier Skaar.

– Ein kan bruke hovudet

Uforsiktig bruk av eld ved bålbrenning og grilling er den vanlegaste årsaka til skogbrann. Ifølgje DSB skuldast ni av ti skogbrannar menneskeleg aktivitet.

– Me bur i eit langstrakt land. Nokre stadar er det trygt å brenne bål i mai, medan andre stadar er det uforsvarleg i mars, seier Lasse Heimdal Generalsekretær i Norsk friluftsliv.

– Det viktigaste ein kan gjere er å tenkje over kva ein gjer, og bruke fornufta, seier Heimdal.

Nokre kommunar ser at turgåarar ynskjer å brenne bål, sjølv når forbodet gjeld. Dei kan då leggje til rette med gruer på rasteplassar og populære turstiar.

– Bålbrenning er ei stor glede for mange turgåarar. Slik tilrettelegging er eit godt tilbod frå kommunane si side, seier Heimdal.