Til stor overrasking for mange spelte Bodø/Glimt uavgjort mot Brann på Aspmyra stadion i Bodø, søndag kveld.
Og det var ikkje berre supportarar frå nord som plutseleg sat med skjegget i postkassa.
Det gjorde òg dei som hadde satsa store pengar på heimelaget.
No er innboksen til klubben fylt til randa av truslar og ønske om at dei skal døy.
Det får Niklas kjenne på kroppen.
– Hadde ikkje satsa alle pengane på Glimt
Niklas Aune Johnsen, pressekontakt i Bodø/Glimt, har ansvar for klubben sine kontoar på sosiale media.
Dei har kokt etter 2–2 resultatet mot Brann i går.
– Det er folk som har mista pengar fordi dei har satsa ut ifrå tabellen. Dei ser at Glimt ligg øvst og Brann ligg nedst, seier Johnsen.
Mange har satsa store pengar. Nokon av dei skriv at dei har satsa opp mot 1000 euro, eller om lag 10.000 kroner, på Glimtsiger.
– Dei skriv at dei håper vi døyr, og at vi ikkje vaknar opp i morgon. Hadde dei vore meir audmjuke kunne eg kanskje syntest meir synd på dei.
Og det er ikkje berre denne kampen det gjeld. Heilt sidan Glimt begynte å vinne kampar frå 2019-sesongen, har dei fått mykje hat når dei ein sjeldan gang ikkje vinn.
Johnsen meiner at dei utanlandske gamblarane ikkje kjenner dynamikken i norsk fotball.
– Det er ikkje unaturleg at eit lag som ligg på botn av tabellen kjempar med nebb og klør. Det skjer kvart einaste år at eit dei tek eit lag godt plassert på tabellen når dei skal klare seg, seier Johnsen.
– Eg hadde ikkje satsa alle pengane mine på Glimt i går.
Molde FK ligg nest øvst på tippeligatabellen. Det har dei vunne fire gonger før, seinast i 2019.
Pressesjef i Molde, Per Lianes, seier også dei har vore borti illsinte gamblarar.
– Ein blir jo kasta skit på i sosiale medium når folk mister pengar, men det er ikkje noko nokon av oss kan noko for. Sånn er jo verda i sosiale medium.
Norsk tipping
Tonje Sagstuen, pressekontakt i Norsk Tipping, forklarar at odds blir sett etter sannsyn for at eit utfall treffer inn. Laget ein forventar vil tape vil ha høgast odds, medan favoritten alltid vil ha lågast odds.
I går hadde altså Brann høg odds, medan Bodø/Glimt var store favorittar og hadde lågast odds.
Begge laga trong ein siger. Anten i kampen for gullet, eller for å berge plassen i Eliteserien. Derfor var det få som satsa pengane sine på uavgjort.
– Når eit lag noko overraskande taper, er det klart at folk kan verte forbanna.
Dei som spelar på oddsen, spelar gjerne på fleire lag i kombinasjon. Sagstuen fortel at for mange rauk nok heile kupongen når Bodø/Glimt ikkje vann.
– Då er det nokon som kan finne på skulde Glimt for kampfiksing. Altså at dei ikkje gir nok for å vinne.
– Det er veldig lite av dette i Noreg. Det er nærmast ikkje eksisterande. Og det er heilt ugrunna. Det er klart at begge lag gjerne ville vinne i går.
Ho synest det er synd at spelarar som har tapt pengar på dette spelet vel å kome med slike utsegner.
– Eg er heilt sikker på at Bodø ikkje ønskte noko meir enn å ta med gullet heim i går, og Brann kjempa for sin eksistens som eliteklubb. Det er jo nettopp dette som gjer fotball så spennande. At det er spenning til siste runde.
Niklas Aune Johnsen i Bodø/Glimt, seier at hetsen ikkje har så mykje å seie for Glimt sin del.
– Eg trur stort sett det prellar av. Det blir litt brutalt i kommentarfeltet og i innboksen, men eg trur ikkje spelarane bryr seg så mykje.