NRK Meny
Normal

40 evakuert etter røykutvikling på hurtigbåt

Hurtigbåten MS Rypøy sende i ettermiddag ut maydaysignal etter røykutvikling i eit maskinrom. Båten kom seg til kai for eiga maskin og alle passasjerane vart evakuert.

MS Rypøy til kai etter evakuering

NAUDETATAR PÅ STADEN: Brann, politi og ambulanse er på kaia kvar MS Rypøy la til. Alle passasjerane og mannskapet er evakuerte.

Foto: 03030-tipsar

– Alle vart evakuert utan dramatikk, seier Rune Danielsen, redningsleiar ved Hovudredningssentralen Nord-Noreg.

Det var 36 passasjerar og fire i mannskapet om bord på hurtigbåten då den var på veg inn mot Sandnessjøen. Litt før kl 15.30 sende dei naudmelding til Kystradio Nord, og fleire fartøy sette kursen mot båten.

MS Rypøy kom seg for eiga maskin til kai i Sandnessjøen, og naudetatar er på plass.

– Ingen passasjerar er komne til skade, so vidt vi veit, seier Danielsen.

Det føregår no undersøkingar om bord for å kartleggje kva som har skjedd og nedkjempe eventuell brann.