Det var eit dramatisk syn som møtte bilistane ved Drageskaret i Sande i 01.30-tida natt til søndag. For bilbrannen utvikla seg i løpet av svært kort tid slik at flammane slukte den svarte BMWen, og røyken sto høgt til vers.
- Det såg voldsomt ut og var ingen kjekk hending, men ikkje særleg dramatisk. Det var berre å gå ut og halde god avstand, seier bileigaren til NRK Møre og Romsdal søndag formiddag.
Såg røyk frå panseret
Mannen, som har hytte i området, seier han såg røyk frå panseret, og difor stoppa. Då han opna var det fyr i motoren.
- Slikt er ikkje råd å sløkke, så det var berre å ringe brannvesenet, seier mannen, som til dagleg bur i bergensområdet.
- Vanskeleg å sløkkje
Brannvesenet kom raskt til staden, men då flammane hadde gjort frå seg, var bilen totalt utbrend. Dei stadfestar at det er vanskeleg å sløkkje ein bilbrann.
– Det å sløkke ein bil er noko av det vanskelegaste som finst. Vi kjem oss ikkje inn for å opne bilen, og må gjere det utanfrå, og det er vanskeleg og tidkrevjande, seier operatør ved 110-sentralen, Åge Henriksen.
Begynte å brenne under køyring
Ifølgje politiet oppdaga mannen bak rattet at det begynte å brenne medan han køyrde.
– Han merka at bilen dabba av under køyringa, og så begynte det å brenne. Dette utvikla seg vidare, men han hadde ikkje problem med å kome seg ut, seier operasjonsleiar Terje Lingås ved Sunnmøre politidistrikt.
Ifølgje brannvesenet blei brannen meldt klokka 1.20, etter seks minutt var brannvesenet på staden, og 20 minutt etter var bilen sløkt og totalt utbrend.
Aldri sett noko liknande
Erlend Vikene bur like ved, og kom til staden etter kort tid. Det såg dramatisk ut.
– Bilen sto i full fyr, då brannen var over sto berre motoren igjen, seier Vikene. Han har aldri sett noko liknande før og seier røyken sto langt til vers.
– Dersom det hadde vore folk inni der hadde det aldri gått bra, konstaterer Vikene.
Den svarte BMWen skal vere ein 2007-modell, opplyser politiet.