Det å arbeide i kommunesektoren er ikkje blant dei mest populære yrkesvala blant ungdom i dag.
Saman med KS går Ålesund kommune inn for å rekruttere ungdom på ein ny måte.
Kristina Rasmussen (27) er nyutdanna sosiolog, og kunne godt fått seg ein jobb i ei privat bedrift. I staden arbeider ho no i kommunesektoren.
Trainee-ordning
Ålesund er ein av få kommunar i landet som har starta ei trainee-ordning, der nyutdanna ungdommar får arbeide på fleire felt innanfor ein kommune.
Her får dei verdfull arbeidserfaring og god innsikt i kommunal forvaltning.
- Eg stortrivst som trainee, seier Kristina Rasmussen.
Mange søkjarar
Personalrådgjevar Magne Karlsen i Ålesund kommune seier at det har vore stor interesse for å delta.
Til det første kullet var det 400 søkjarar til 13 plassar på landsplan.
I løpet av 18 månader skal Kristina Rasmussen få prøve seg innanfor fleire forskjellige fagfelt i rådhuset.
27-åringen kan godt tenke seg ei framtid i kommunesektoren, og no får ho ei god innføring på rådhuset i Ålesund.