Det er nettavisa Sysla som fredag ettermiddag skriv at investoren og Frp-politikaren Tom Henning Slethei frå Sola vil inn på eigarsida i Havila.
– Vi kan ikkje ta heile smellen, seier han til avisa.
Misfornøgde med redningsplanen
Havila er eitt av reiarlaga som no kjempar hardt for å unngå konkurs. Selskapet skulle etter planen betale 3,2 milliardar kroner i avdrag i perioden 2017-2019, men la onsdag fram ein ny plan som dei håper skal gje dei høve til å halde fram til november 2020.
Men torsdag kom det fram i ei børsmelding at fleire obligasjonseigarar er misfornøgde med den løysinga som leiinga i selskapet presenterte tidlegare i veka.
Vil ta over styringa av Havila
Ifølgje Sysla varslar no nokre av långjevarane at det siste forsøket på ein redningsplan kjem til å bli torpedert. Avisa skriv at Havila i august 2012 lånte 500 millionar frå 130 investorar, gjennom eit obligasjonslån. Dei skulle få nesten 10 prosent rente på investeringa, før dei skulle få heile beløpet tilbake i august i år.
Det skjedde som kjent ikkje, og no vil nokre av långjevarane ifølgje avisa gjere om låna sine til eigenkapital, og dermed overta aksjemajoriteten i Havila.
–Vi meiner det er ei god løysing, både for oss, bankane og reiarlaga, seier Slethei.
Havila møter obligasjonseigarane 23. november.