Vil hindre fleire ulykker med grillkol på stranda

Marius Bjørneset Steen fekk andre grads forbrenning i ein fot då han leika på badestranda i Ålesund. Han hadde trakka på brennande grillkol andre badegjestar hadde reist frå.

I sjukesenga fekk Marius denne helga besøk av brannvesenet i Ålesund. Dei hadde med seg ein bamse til guten.

Bamsen Bjørnis er brannbamse i brann- og redningstenesta, og skal gi barn og vaksne gode råd om brannvern.

No håper både Marius og Bjørnis at andre barn skal sleppe smerter på grunn av at folk ikkje tenker seg om.

– Må skjerpe seg

– At folk er ute og kosar seg er fint. Men dei må skjerpe seg når det gjeld rydding og sløkking etter grilling, seier brannkonstabel Øyvind Gresdal i Ålesund brannvesen.

Om ulykka skulle skje, er rådet frå brannvesenet 20 grader vatn i tjue minutt. Om ein ikkje har anna tilgjengeleg er nedkjøling i sjøen betre enn ingen ting.

Fjernar død hud

Etter grillkolulykka har femåringen vore i narkose og fjerna all død hud to gonger. Marius går no kontinuerleg på smertestillande. Han får ikkje gå på foten på tre veker.

– Neste gong han skal behandlast kan det hende han slepp narkose, seier mora til guten, Olaug Bjørneset. – Vi håper det går fint.

Uansett blir det ikkje noko meir bading denne sommaren på guten som elskar å bade i sommarferien.

Vi gjer merksam på at mora til guten, Olaug Bjørneset, er tilsett i NRK Møre og Romsdal. Saka vart først omtalt på NRK fredag.