Vil ha leiing på kvart sjukehus

Administrerande direktør Øyvind Bakke orienterte i dag styret i Helse Møre og Romsdal om at han vil ha leiing ved kvart av sjukehusa i Møre og Romsdal.

Han grunngjev dette med at han vil ha meir effketive leiarliner, større nærleik til drifta og at fleire avgjerder skal takast nærmast mogleg pasientane.

– Eg vil redusere talet på saker som må løftast opp til den øvste leiinga, sa Bakke under orienteringa si.

Fleire avgjerder skal dermed takast på kvart enkelt sjukehus, ifølgje forslaget frå Bakke.

Bakke vil også opprette ein ny klinikk som blir klinikk for prehospitale tenester. Denne klinikken skal stå for ambulansetenestene og pasientreiser.

Han vil også ha ei eiga samhandlingsavdeling som er direkte underlagt direktøren. Avdelinga skal ha ansvaret for samarbeidet med kommunane.

Bakke vil gjennomføre den nye organiseringa allereie frå 1. mars. Dersom styret godtek planen til Bakke blir arbeidet med omorganiseringa starta 3. februar.