Vil ha i gang gassdebatten

Sist vinter var det snakk om å ta i bruk gasskraftverka på grunn av fare for straummangel og svært høge prisar i Midt-Norge. No er det på tide å få i gang debatten om bruken av dei mobile gasskraftverka på Aukra og Tjeldbergodden igjen, meiner Riksfjord, som mislikar at debatten om vanlege gasskraftverk utan reinsing skal blandast inn.

– Dei mobile gasskraftverka er på plass og overordna styresmakter meiner dei skal brukast, og så skal dei likevel ikkje brukast. Det får eg ikkje til å stemme, seier Aukra-ordføraren.

• Kraftkrisen er ubehagelig nær

Kald vinter

Dei første månadene av 2010 var det unormalt kaldt i store delar av Midt-Noreg. Fleire bedrifter blei mellom anna bedne om å spare straum om det var mogleg, og prisen gjekk i taket. Dei mobile gasskraftverka på Aukra og Tjeldbergodden blei ikkje tekne i bruk for å hjelpe situasjonen.

Olje- og energiministeren sa nei til at Statnett kunne fyre opp, men Riksfjord trur denne debatten vil kome med full styrke dersom det blir kaldt i vinter.

– Kraft vil vi ha, men vi vil ikkje at det skal kome frå nokon stad. Det kjem i alle fall ikkje gjennom lufta, seier Riksford oppgitt.

• Skyhøye strømpriser var unødvendig

– Meiningslaust

Olav Magnus Linge frå Valldal er leiar i Sosialistisk Ungdom. Han likar ikkje tanken på ein oppstart.

– Det er meiningslaust å ha ein ny debatt kvart einaste år det er ei ny krise i kraftsituasjonen, der det kun er mobile kraftverk som er oppe som alternativ, seier Linge.

Han meiner vi treng langsiktige løysingar med satsing på offshore vindkraft og å endre norsk energipolitikk.

– Bygg heller i Elnesvågen

Stortingsrepresentant Elisabeth Røbekk Nørve frå Høgre meiner utspelet til Aukra-ordførar Bernhard Riksfjord er heilt på sin plass i forhold til den situasjonen som kan kome i vinter, men meiner han bør fokusere på bygging av gasskraftverk i Elnesvågen heller enn dei mobile gasskraftverka på Aukra og Tjeldbergodden.

– Det er langt viktigare at han no får med seg sine eigne i Arbeidarpartiet til å bygge gasskraftverk i Elnesvågen. Det er langt mindre forureinande enn dei mobile gasskraftverka, seier Nørve.