Det er frykt i skipsbyggarkommunen Vestnes for at utanlandske gjestearbeidarar skal spreie koronasmitte.
Dei siste dagane har om lag 1000 utanlandske arbeidarar kome heim frå juleferie. Desse sit i karantene, men ifylgje nasjonale retningsliner kan dei gå i butikken eller ut i naturen, så lenge smittevernreglane blir følgt.
– Eg får meldingar frå lokalbefolkninga om at dei er bekymra, seier ordførar Geir Inge Lien (Sp).
Møte med næringslivet
30 testa positivt på covid-19, sjølv om dei har dokumentasjon på negativ test før avreise.
Kriseleiinga i Vestnes var samla måndag og bestemte at dei ikkje vil innføre ei eiga lokal forskrift for arbeidarane i karantene, men dei kjem med ei oppmoding.
– Vi vil anbefale alle som sit i karantene om å ikkje gå på butikken, men at maten blir handla inn for dei, seier Lien. Dei anbefaler også generelt folk om å bruke munnbind på butikkar og i kollektivtransport. Onsdag kallar dei inn næringslivet til møte.
Får ikkje gå på butikken
Verftskonsernet Vard har 800 arbeidarar som har kome frå utlandet. Kommunikasjonssjef i Vard, Hege Akselvoll, seier at dei har innført strengare tiltak enn dei nasjonale reglane.
– Vi aksepterer ikkje at dei går på butikken. Skulle arbeidarane ha behov for meir enn det dei får servert, utfører vi den tenesta for dei, seier Akselvoll. Arbeidarane bur i einerom på brakker og der er det vakthald. I tillegg til koronatesten dei må ta i heimlandet, blir dei testa ytterlegare to gongar i Noreg. Bedrifta har eige helsepersonell.
– Vi ser at det blir spekulert i om dokumentasjonen frå heimlandet er falske. Så langt har vi ikkje avdekt falske testar, seier Akselvoll. Ho trur at arbeidarane kan ha blitt smitta på reisa.
Utanfor butikken i Vestnes fortel folk at dei er lite redd for smitte frå gjestearbeidarar. Hilde Marie Hovde er ein av dei og understrekar at ho synest Vard verkar som dei har god kontroll. Et forbod mot å handle når man er i innreisekarantene trur ho likevel kan vere lurt.
– Det kan kanskje få folk til å føle seg tryggare. I tillegg slipp gjestearbeidarane å få skylda for å smitte andre, seier ho.
Vil ha fleire norske arbeidarar
Ordførar Lien synest næringslivet gjer ein god jobb med å hindre smitte og at dei tar smittevernreglane seriøst. Sjølv skulle han ynske at industrien ikkje var så avhengige av utanlandske arbeidarar.
– Eg legg ikkje skjul på at eg ynskjer å få på plass fleire lokale, norske fagarbeidarar. Vi må få fleire ungdomar til å velje den retninga, seier Lien.