11 år gamle Bektur Usenalijev frå Kirgisistan har vore ved asylmottaket i snart seks år.
Han spelar i dag fotball på Hødd sitt G11-lag. Det har han gjort sidan han gjekk i 1.klasse.
For Bektur er dette krydderet i kvardagen. Å få spele fotball saman med kameratar er avgjerande for trivsel og god integrering. Han snakkar for lengst flytande norsk og er stolt av å ha på seg den blå drakta.
Det same gjeld for 8 år gamle Ayan Adnan frå Somalia. Ho spelar også fotball i Hødd og trivst veldig godt i miljøet.
Dreg med foreldra
Denne dagen er det idrettsdag i Ulsteinhallen for asylsøkarar i alle aldersgrupper frå Ulstein og Volda. Det at borna er med i idrettslaga gjer også at dei dreg med seg dei vaksne på dugnader og liknande. Dermed får dette ein ekstra positiv effekt på integreringsarbeidet. Det seier Iselin Eliassen Aske som har ansvar for informasjon og barne og ungdomsarbeid ved LINK sitt mottak i Ulsteinvik.
Aske seier at faste aktivitetar gir borna eit godt nettverk.
– Aktivitetsdagen i Ulsteinhallen er eit døme på at dei ønskjer å gjere noko anna enn å informere teoretisk. Fysisk helse er noko dei er pålagde å informere om og då er det kjekkare å gjere dette i praksis.