- Dette har vi venta på i førti år, seier leiar i planutvalet for Hatlehol kyrkje, Arvid Brevik.
I Møre bispedøme er det 120 kyrkjer i ordinær bruk. Seks av desse finn ein i Ålesund kommune. Derimot har den tredje største menigheita i landet, Spjelkavik sokn berre ei av desse.
Plassmangel
Spjelkavik sokn har omlag 17 000 medlemmar, men berre ei kyrkje. I mange år har det vorte jobba for å få på plass ei kyrkje til og no ser det ut til at Hatlehol kyrkje kan verte ein realitet. Arvid Brevik meiner at dette er på høg tid.
- Vi må ut og finne kriseløysingar for å greie å handtere behovet. Store delar av innbyggjarane i Ålesund bur i Spjelkavik sokn og alle desse skal dele på ei kyrkje, seier Brevik.
Stiftsdirektør i Møre Bispedømme, Jan Egil Korseberg, har forståing for ynskjet om ei ny kyrkje.
- Det er vanskeleg å drive ei menigheit med så mange medlemmar rundt berre ei kyrkje, altså Spjelkavik kyrkje. Så eg forstår at dei lokale ønskjer seg eit kyrkjebygg til.
