På barnerommet på Skodje er leiken i full gang. Noah Grindvik (9) bygg lego, medan lillesøstra og søskenbarnet leikar med barbiedokker. Når Noah smiler er det eit skeivt smil.
– Forma er litt betre, men det er litt vanskeleg å blunke. Eg får ikkje heilt att eine auget, fortel niåringen.
Vakna lam i ansiktet
Ein morgon i sommar oppdaga mamma Linn Grindvik at Noah såg annleis ut i ansiktet. Ho vart redd og ringde til legen. Ho tenkte på alle moglege alvorlege sjukdomar som kunne gi lamming i ansiktet.
– Det var skummelt, seier Linn Grindvik.
Noah vart sendt vidare til barneavdelinga i Ålesund, og dei såg alle teikna på borreliasmitte. Noha fekk antibiotika og sjølv om forma er stigande, er han framleis lam i halve ansiktet.
LES OGSÅ:
Uvanleg mange
Denne sommaren har det vore uvanleg mange barn som har blitt innlagt på sjukehuset i Ålesund med borrelia.
– Vi har hatt 10–12 barn som har blitt innlagt med borreliainfeksjon. Dei fleste har einsidig lamming i ansiktet, fortel seksjonsoverlege Bjørn Magne Jåtun.
Ein del av dei har ikkje lamming, men er trøytte, slappe og har hovudverk.
Slapp i vekevis
I ei sjukehusseng ligg fem år gamle Bjørk saman med kosekaninen sin. Saman med henne er mamma Marit Storjord Vestad og mormor May-Britt Storjord. Også Bjørk er lamma i halve ansiktet etter flåttbit.
– Det starta med at ho var slapp nokre veker. Då ho fekk ansiktslamming mistenkte vi flåttbit, seier Marit Storjord Vestad. Etter å ha vore innom både lege og legevakt, vart dei sendt vidare til barneavdelinga i Ålesund. Bjørk får intravenøs antibiotika og når dei kjem heim til Molde får dei hjelp av heimesjukepleien i kommunen.
Aktiv flått
Talet på folk som vert smitta av borrelia held seg ganske jamt kvart år, ifylgje Folkehelseinstituttet. Rundt 300 personar årleg får det ein kallar systemisk sjukdom. Mange får ein karakteristikk raud ring rundt bitet og vert behandla med antibiotika. Desse vert ikkje meldt inn til Folkehelseinstituttet.
Seniorforskar Arnulf Soleng ventar ikkje at talet på dei som vert smitta skal stige.
– Det kan vere store lokale variasjonar. Dersom det er varmt og tørt er flåtten lite aktiv, medan dei er meir aktive når det er fuktig ver. Denne sommaren har vore dårleg mange stader og då flåtten vere meir i aktivitet, seier Arnulf Soleng.
Sjekke flått
Noah Grindvik på Skodje har ikkje vore i form til å leike seg ute den siste tida, men mamma Linn Grindvik veit at når den tid kjem skal ho vere nøyare med å sjekke flått.
– Eg har jo sjekka før også, men heretter skal eg sjekke i hår og hovudbotn også, seier Grindvik.