Difor vil dei no ta nye prøver, mellom anna for å finne ut om det er kvikkleire eller blåleire som er i grunnen. Kvikkleire kan utløyse leirskred, og fleire av dei store naturkatastrofane i Noreg har vore kvikkleireskred.
Får ikkje rydde
Dermed får vegvesenet førebels ikkje starte med å rydde fylkesveg 670 i Ålvundfjord i Sunndal. Det store leirraset gjekk over vegen i går kveld, sperra den viktige pendlarvegen, og delte kommunen i to.
Geoteknikarane frå Norconsult kom til rasstaden klokka 10 i dag. Dei har undersøkt området, men treng meir tid for å finne ut om det er trygt å opne vegen.
– Vi har vore der og sjekka massane, men vil undersøke dei nærare på laboratoriet i Molde, før vi kan seie om det er trygt. Der er ein del leirmassar vi er usikre på, seier Steinar Vestnes i Statens vegvesen til NRK.
Usikkert om vegen kan opne
Steinar Vestnes vil førebels ikkje seie noko sikkert om vegen kan opne i dag, eller ikkje.
– Vi arbeider heile tida, og med ein gong vi veit korleis vi skal gjere det, så set vi i gang, seier Vestnes.
Etter at analysane av leire er klare, skal fagpersonane samlast for å avgjere korleis situasjonen kan løysast.