Leiinga i avisa for Herøy og Sande nektar dei tre journalistane å signere artiklane sine, og ifølgje Norsk Journalistlag strir dette mot Åndsverkslova.
– Etter mi meining driv dei lovstridig. I Åndsverkslova står det veldig tydeleg at opphavsmannen har krav på å bli namngitt.
Einaste avisa i landet
Leiar Elin Floberghagen i Norsk journalistlag seier Vestlandsnytt er den einaste avisa i landet ho kjenner til som har ein slik praksis.
– Dette er veldig spesielt og veldig uvanleg i norsk presse, seier Floberghagen.
Avisartiklar er vanlegvis utstyrte med namn, og gjerne også telefonnummer og epostadresse til journalisten som har skrive saka.
Men slik er altså ikkje praksisen i lokalavisa Vestlandsnytt.
Håper på endring
Endre Vorren, som er ein av journalistane håper det no blir ei endring.
– Vi har vel tenkt at dette har vore litt på kanten. Så no må vi berre rekne med at leiinga vil følgje opp og halde seg innanfor lovverket.
Alle artiklane i Vestlandsnytt er usignerte.
Foto: Olaug Bjørneset– Har alltid gjort det slik
Redaktør Jann Flatval seier til NRK at han ikkje er klar til å svare på kvifor avisa har ein slik praksis.
Eigar og dagleg leiar Fred Frantzen seier dei alltid har gjort det slik, men at dei no vurderer å endre praksisen.
NJ-leiaren seier dei vil ta opp saka dersom ikkje dette skjer raskt.
– Eg vil på det sterkaste oppfordre redaktøren til å respektere norsk lov, og la journalistane få byline på trykk. Dersom det ikkje hjelp, får vi ta kontakt no over ferien, konstaterer Elin Floberghagen.
