– No er vi ved eit vegskilje. Dersom dette held fram må vi vurdere om godstrafikk på Raumabanen i det heile tatt er liv laga.
Det seier direktør i Green Cargo Kjell Owrehagen. Det har lenge vore godstrafikk på Raumabanen, både med Green Cargo og andre selskap.
Men med rasutsette «Mannen» hengande over jernbana og uvissa det medfører, seier Owrehagen at det blir vanskeleg å forsvare situasjonen overfor kundane som er avhengig av å frakte godset sitt på Raumabanen.
– Så langt har tolmodet til kundane vore der, men no er det klare signal på at dei vil bli tvungne over på vegtransport dersom uvissa held fram.
Owrehagen understrekar at det ikkje er misnøye med sjølve bana, men med den usikre situasjonen med rasfare og stenging.
– Når bana er open er det den desidert mest punktlege for godstransport i heile landet, men det hjelp ikkje når godstoga blir ståande.
Vil vere eit stort tap for Rauma
– Eg har forståing for situasjonen til Green Cargo og at dette skaper forstyrringar for dei, men håper dei står løpet ut.
Ordføraren seier dette kan få store ringverknader for Rauma kommune. Det handlar ikkje berre om gods som kjem fram.
Mange arbeider med å frakte gods til og frå Åndalsnes, i tillegg til dei som jobbar på sjølve terminalen.
– Det er nok ein del arbeidsplassar som står i fare, og arbeidsplassar er trass alt det viktigaste vi har.
– Vi håper og trur at dette er ei tung kneik vi kjem oss over. Eg vil ikkje spekulere i om dette kan vere slutten for godstrafikk på Raumabanen.