19-åringen må møte i retten i februar for å svare for seg, etter at han i august skal ha sperra inne ein sjukepleiar ved Molde sjukehus og nekta henne å sleppe fri.
Hendinga skjedde like før midnatt 12. august i år.
Skal ha låst seg inne med sjukepleiaren
Ifølgje tiltalen tok han seg inn på alarmsentralrommet der sjukepleiaren var, låste døra innanfrå, og nekta henne å gå derifrå ved å hindre henne fysisk og verbalt fleire gongar. 19-åringen skal ha skubba henne, lagt henne i bakken og sagt at ho ikkje fekk gå.
Ifølgje tilalen var han oppfarande og sint, og velta mellom anna ein kontorpult, knuste fleire tastatur og veiva med ei vifte.
Tiltalt for politivald
I etterkant av episoden på sjukehuset, skal mannen også ha kome i klammeri med politiet fleire gongar.
Med mindre enn ein times mellomrom skal han ha forsøkt å hindre politiet i arbeidet sitt natt til torsdag 22. oktober. Han er tiltalt for å ha sparka to politimenn og dytta ein tredje.
Mannen er også tiltalt for fleire tjuveri, ulovleg køyring og narkotikalovbrot.
15. februar må han møte i Romsdal tingrett.
