Klokka 18.24 melder Molde sjukehus at tenåringen er stabil og at skadane er lette.
Kollisjon i kryss
Politiet i Nordmøre og Romsdal fekk melding om ulukka klokka 15.10.
– Ulukka skjedde i innkøyringa frå riksveg 64 til fylkesveg 176 i Isfjorden, sa operasjonsleiar Tore Hals.
Bilisten, som kom frå Åndalsnes, kom uskadd frå samanstøyten. Syklisten, ein gut i tenåra, blei derimot skadd.
– Han blei først køyrt til legevakta på Åndalsnes, men er send vidare til sjukehuset i Molde. Meir veit vi ikkje per no, fortalde Hals til NRK like før klokka 16.00.
Uklar hendingsgang
Syklisten var i starten av tenåra, medan bilføraren var i midten av 30-åra.
– Han var åleine i bilen, opplyser Hals.
Politiet fortel at det er for tidleg å seie noko om hendingsgangen.
– Etterforskinga vil vise kva som har skjedd, slår operasjonsleiaren fast.
Kor alvorleg det er for guten i tenåra er førebels uklart. AMK-sentralen i Molde kan ikkje gå ut med informasjon per 18.00 torsdag.
NRK følgjer saka.
