Måndag kom nyheita om at Nordli er ekskludert frå Senterpartiet, halvanna år etter at lokalpolitikaren frå Kristiansund vart ekskludert frå Framstegspartiet.
Senterpartiet i Møre og Romsdal vil ikkje seie kvifor dei ekskluderer Geir Nordli, anna enn at det gjeld varsel om trakassering.
Men i ei pressemelding skriv han sjølv at ein konflikt rundt den uføre lokallagsleiaren Berit Frey kan ligge bak. Frey har i likskap med Nordli vist interesse for å vere partiet sin ordførarkandidat neste år.
Vil ha same rettane
Frey seier at ho ikkje har høyrt noko frå Nordli personleg om denne saka, men synest det er leit om ho som ufør ikkje skal kunne engasjere seg i politikken.
– Skal ikkje 330.000 uføre personar ha dei same rettane som andre til å engasjere seg i politisk arbeid, spør Frey.
Ho har blitt spurt om ho kan tenke seg førsteplassen på lista til kommunevalet neste år. Det har ho sagt ja til.
Men ikkje alle er altså einige i kandidaturet.
Geir Nordli viser i pressmeldinga også til ein liknande debatt i Hvaler Høyre, der førstekandidaten – som også er ufør – skal ha forstått at det var eit legitimt spørsmål.
– Eg meiner det er urimeleg å tenke slik at uføre ikkje skal kunne ta på seg verv. Ein må heller tenke at folk skal vere med og påverke, seier Berit Frey til NRK.
Vart lam i handa
Som 24-åring i 1985 vart Berit Frey skadd i ei MC-ulykke. Ho vart lam i høgrehanda. Likevel hindra det ikkje Frey i å ta mykje utdanning og jobbe mange år i kommunen. Frey har også engasjert seg sterkt innan idrett og anna frivillig arbeid.
Nokre år gjekk det derimot tyngre og ho vart ufør. Men ho er no svært engasjert i Senterpartiet, og er mellom anna leiar i lokallaget i Kristiansund, medlem i fylkesstyret, kommunestyremedlem og varamedlem til formannskapet.
Får advokatstøtte
Advokat Arvid Reidar Ødegård, ekspert på arbeidsrett, er sterkt kritisk til diskusjonen i Senterpartiet om kor vidt ein ufør person kan bli ordførar eller ei.
– Heile diskusjonen er tullete og er eit blindspor, seier Ødegård.
Og kjem med eit døme frå eige liv:
– Sjølv fekk eg for mange år sidan kutta av to fingrar på venstrehanda. Det har ingenting å seie for min jobb som advokat. Men hadde det same skjedd fetteren min, som er keivhendt og tannlege, så hadde det vore annleis.
Frey og Ødegård får støtte frå NAV sine retningslinjer, som seier at dei uføre kan jobbe så mykje dei vil.