Tyskarane vil fiske. Og dei vil fiske mykje, og lenge. Roy Bergsås leiger ut hus til tyske turistar på Godøya i Giske . Han ventar innrykk av tyske gjester om kort tid. Og dei har berre ei interesse, fortel Bergsås.
- Det er fisking. Hadde dei hatt høve til å fiske 24 timar i døgnet så hadde dei nok gjort det, seier Bergsås.
Stor etterspurnad
Mange av huseigarane leiger ut husa sine gjennom selskapet Novasol. I Noreg tilbyr Novasol 1700 feriebustader, og har no nær 1200 bestillingar i vår-vekene. Størst etterspurnad er det etter hus og hytter i Hordaland, Rogaland, Vest-Agder og Møre og Romsdal.
- Frå siste veka i april og til utgangen av mai har vi omtrent dobbelt så mange bestillingar på feriebustader i Noreg som same periode i 2009, seier Grete Sexe i Novasol.
•
Strenge fiskereglar i Tyskland
Det er kanskje ikkje lett å finne årsaka til den intense interessen for å sitje timesvis i båt med stanga i handa, berre for å vente på at fisken skal bite. Men Bergsås meiner at strenge fiskereglar i Tyskland kan vere ei av årsakene.
- Eg veit vel ikkje meir enn det eg har høyrt og sett på TV. Men eg har høyrt at det er veldig strengt med fisking i Tyskland. Dei må gå på kurs berre for å få lov til å fiske i mange elvar. Det er voldsomt strengt, seier Bergsås.
•
•
•
Nesten berre fiske
Roy Bergsås seier at turistane som besøkjer han stort sett berre er opptekne av fiske. Han trur ikkje dei reiser så mykje rundt i distriktet for å oppleve andre ting.
- Nei, det er 80 prosent fiske. Då kjem dei gjerne i kameratgjengar på tre, fire, fem stykker. Då reiser dei ut på sjøen i 7 - 8 timar. Så er det heim og gjere opp fisken og så set dei seg ned for å slappe av etterpå. Eg trur ikkje det er så mykje anna det går i, seier Bergsås.
•
•
Enorm auke
Etterspørselen etter hus og hytter med båtutleige er rekordstor i vår. Frå slutten av april til slutten av mai har utleigefirmaet Novasol dobbelt så mange bestillingar som i same perioden i fjor. Tidleg i sesongen er det mannlege fisketuristar som dominerer, medan familiane overtar seinare på sommaren.