NRK Meny
Normal

Trur på gjentaking av 2011

– Det er fullt mogleg å halde oppe posisjonen som ordførarpartiet i Møre og Romsdal etter kommunevalet neste år, meiner fylkesleiar i Høgre, Geir Ove Vegsund.

Geir Ove Vegsund

Fylkesleiar i Høgre og ordførar i Sula, Geir Ove Vegsund, er urokkeleg i trua på Høgre og meiner det er lite som står i vegen for å gjenta valsuksessen frå 2011.

Foto: Terje Reite / NRK

Etter kommunevalet i 2011 fekk Høgre heile 15 av ordførarane i Møre og Romsdal – ti på Sunnmøre, fem i Nordmøre og Romsdal.

Målet er å kome opp på same nivå neste år, seier Vegsund, som og er ordførar i Sula.

Han meiner Høgre står like sterkt kommunalpolitisk i år som for tre år sidan.

– Ja, absolutt. Vi trur det er meir å gå på når det gjeld Nordmøre og Romsdal, men ambisjonane er i det aller minste å forsvare den posisjonen vi fekk etter førre kommuneval.

Les og:

Nøgd med 34 prosent

Det blei 36,8 prosent oppslutning for Høgre sist gong det var val her til lands i 2011. Torgeir Dahl kunne då ta over ordførarstolen som ein av heile femten Høgre-ordførarar i Møre og Romsdal.

– Offisielt er vi veldig nøgd med 34 prosent, men om vi fer 35 eller over er vi kanonnøgd. Det er det vi går for, sa Dahl den gongen.

Torgeir Dahl

– Vi går for over 35 prosent, sa Dahl ved valet i 2011. Den gongen fekk han rett, Høgre fekk 36,8 prosent oppslutning. Kan partiet klare det same i 2015?

Foto: Hans Thomas Eikrem / NRK

No startar den tøffe jobben med å kopiere suksessen frå 2011, denne gongen etter å ha sete i regjering og varsla store endringar for Kommune-Noreg.

Vegsund er optimist.

– Det er veldig viktig for oss å ha mange Høgre-ordførarar i fylket. Det er noko vi vil legge vekt på no i tida framover mot 2015.