Dei tilsette ved klesprodusenten Wenaas i Måndalen i Romsdal trudde bedrifta tente pengar og at jobben var trygg. Men i går kom beskjeden: Lageret blir flytta til austlandet og opp til 40 kan misse jobben.
Tillitsvald Aud Hansen Venås seier folk reagerer med frustrasjon og sinne.
- Vi er sjokkerte og frustrerte over at dei skal legge ned lageret.
- Så dette kom heilt som lyn frå klar himmel for dykk?
- Ja, det gjorde det faktisk. Det vart frykteleg stille her i går då beskjeden kom.
Les:
Tung arbeidsdag
Folk var på jobb i dag, men det var tungt og for mange gikk det for halv maskin. Dei trudde dei hadde ein trygg arbeidsplass.
- Beskjeden som kom i går var tung, seier Toril Naas.
- Vi har eigentleg ikkje fått noko hint eller noko som helst. Wenaas har overskot og vi trudde det var ei sikker bedrift, og så fekk vi dette tredd over hovudet i går.
Wenaas i Måndalen er ein hjørnestein i næringslivet i Rauma kommune. Dei som jobbar her trudde bedrifta tente pengar. I første halvår i år var overskotet på 30 millionar kroner.
- Ingen veg utanom
Men dagleg leiar Jostein Strand seier dei har gjort ei grundig vurdering.
- Vi har resultatmessig ei god utvikling i 2010, men vi forheld oss ikkje til det isolert sett. Vi ser meir i forhold til dei utfordringane vi står framfor.
Strand seier at flytting av lageret er einaste utveg.
- Vi er fullt klar over den betydninga bedrifta og dei som bur i Måndalen har for kvarandre, men det var ingen veg utanom. Reknestykket, vurderingane og analysane som er gjort er svært eintydige.
Likevel er dette vanskeleg å svelgje for dei tilsette.
- Det har vore ein god arbeidsplass i mange år. Mange har vore her i 40 år, og vi har no vore trygge bestandig, så vi har stolt på denne plassen, seier Toril Naas.