– Det var meir som eit sjokk. Eg opna mailen og jubla, seier Suzanne Misund.
Korpskollegaen Eskil var også inne på skulebiblioteket. Han skjønte at noko spesielt hadde skjedd. Og då trommeslagaren sjekka mobilen, så hadde også han fått plass i Gardemusikken!
Musikktroppen til Kongens Garde er eit mål for mange ungdommar som satsar på musikk. Det er hard kamp om plassane. Vestnes skolekorps i Møre og Romsdal har 15 medlemmer. No er to av dei tatt opp i musikktroppen.
– Det er ikkje ofte to frå same korps kjem inn, seier kaptein Marita Sæther. Ho er kompanisjef for Gardemusikken. Kvart år har dei ei lang liste med namn på musikkinteressert ungdom som får møte til prøvespeling
Ein draum går i oppfylling
Den talentfulle kornettisten Suzanne Misund trur det komande året kjem til å bli lærerikt og morosamt. Gardemusikken har ho sett i aksjon kvart år på korps-NM.
– Kvar gong har eg tenkt på kor fantastisk det hadde vore å spele med dei. Og no er det akkurat det eg skal!
Omfattande reiseverksemd
For det norske folk er Gardemusikken kjent for å skape stemning på 17. mai og kongelege festdagar. Men dei turnerer også mykje rundt om i heile landet. Innimellom er det intense øvingsperiodar, med pirk og detaljar.
Joel Skreosen (20) frå Porsgrunn var med som trommeslagar for to sesongar sidan.
– Det var det beste og verste året i livet mitt. I alle fall det hardaste. Du lærer deg å tenke enkelt. Det må du, om du skal greie å henge med.
Vil bli komponist
I dag arbeider han som elektrikar i Tyskland, men musikken vil alltid vere viktig i livet hans.
– Draumen er å kunne komponere musikk. Men det er krevjande om ein skal prøve å leve av dette.
Suzanne Misund skal først gjere unna NM for skulekorps med vestneskorpset, men ser fram til det komande året på ein ny og spennande arena.
– Korpset i Vestnes har vore ein fristad og ein plass der eg har funne venner. Samhaldet og vennskapet på øvingar og turar er heilt unikt.
No håper ho å oppleve det same i korpset til kongen.