Ifølgje politiet klokka 16.55 var det ein bil som kom over i feil køyrefelt, og frontkolliderte med ein annan ved Nesjestranda i Molde laurdag ettermiddag.
– Vi trur at det har vore for høg fart i forhold til forholda på staden, og at bilisten har mist kontrollen over bilen og kome over i motgåande køyreretning, seier operasjonsleiar Leif Bergem-Ohr ved Nordmøre og Romsdal politidistrikt laurdag ettermiddag.
Truleg hardt skadd
Føraren, ein 18 år gamal mann, blei truleg hardt skadd og er no flogen med helikopter frå staden.
I den andre bilen var det fire personar, dei er sende til legevakt i ambulanse og privatbilar, og skal ikkje vere alvorleg skadde.
Dei to bilane kolliderte i ein sving, og politiet trur altså at 18-åringen har mist kontrollen, fekk sleng på bilen og hamna i fronten på bilen som kom imot.
Vegen open
Laurdag klokka 17.25 melder politiet at fylkesveg 64 er open igjen, etter å ha vore stengd etter ulykka.
Ifølgje politiet er det også bedt om strøbil til ulykkesstaden. Bergem-Ohr seier han ikkje veit kor glatt det er i området.
Ulykka skjedde om lag 200 meter sør for Vik-tunnelen på fylkesveg 64.
Det er 70-grense på staden.