Tiltalt for å ha lyst ut dusør for lovleg rovviltjakt

Trygge beiteområde for sau er bakgrunnen for rettssaka mot Møre og Romsdal Sau og Geit i Søre Sunnmøre tingrett.

Fylkeslaget er tiltalt for å lyse ut skotpremie til rovdyrjegerar.

– Eg føler sjølv at vi har ei god sak, og eg står for det eg har sagt. Eg meiner at vi ikkje har gjort noko gale, seier Odd Bjarne Bjørdal, tidlegare leiar i Møre og Romsdal Sau og Geit.

• Les også: Lover skuddpremie til den første som skyter fredet vilt

Lyste ut dusør

Bakgrunnen for saka var fleire stygge sauedrap i Oppland og Møre og Romsdal i 2013. Det blei gitt eit fellingsløyve og i den samanheng lova Møre og Romsdal Sau og Geit ti tusen kroner i dusør til den som lovleg skaut freda vilt som drep beitedyr.

– For Møre og Romsdal Sau og Geit er dette ei prinsipiell sak. Denne saka vil ha stor betydning i forhold til å få svar på om det er straffbart eller ikkje, seier advokatfullmektig Lasse Gommerud Våg.

Fylkeslaget blei meldt til politiet av dyrevernorganisasjonar for å ha lyst ut skotpremien. Saka blei først lagt bort, men anka av dyrevernarane. Bota på 15.000 kroner blei avvist og no meiner forsvararen i tillegg at saka er forelda.

– Vi meiner at den er forelda med bakgrunn i den nye straffelova sin regler om forelding, seier Gommerud Våg.

• Les også: Avfeier kritikken mot Sau og Geit

Har vekt reaksjonar

Mange sauebønder reagerer på at saka har hamna i retten.

– Eg føler meg trakassert som brukar av utmarka og forsvarar av dyra mine, seier Atle Arnesen, saueeigar.

Han får støtte av Knut Hustad.

– Sjølv om dette er ei bagatellsak, så er det ei viktig sak. Det er dette vi driv å kranglar om i næringa; nemleg kva vi har lov til og kva som ikkje er lov. Eg håper at saka blir lagt bort, seier han.

Søre Sunnmøre tingrett skal avseie dom i saka på torsdag.

– No får vi ein dom i saka, og kan forhåpentlegvis bli ferdig med det, seier Odd Bjarne Bjørdal.

• Les også: Solhjell reagerer på rovdyr-dusør