Tilnærma hallelujastemning hos Kleven

– For oss var det ei fantastisk moglegheit, seier Petter Stordalen.

Han opna allmøtet med å fortelje energisk om vakkert landskap og snødekte fjelltoppar under innflyginga.

Også i fortsetjinga var møtet prega av mykje skryt og god tru på framtida til Kleven.

– Vi hadde jo vurdert ei rekke forskjellige verft for å bygge nye, miljøvennlege cruiseskip, som skal gå inn mot polare farvatn.

– Grunnen til at vi valde Kleven var at dei konkurrerer i verdsklasse, med mykje automatisering.

Når oljeprisfallet kom blei Kleven hardt ramma, og måtte ha inn ekstern kapital for å berge selskapet.

Stordalen seier dei såg det som ei fantastisk spennande moglegheit, men er også klar over at det er ei utfordring.

– Vi har gjort ei vurdering av korleis det ser ut fram over. No er det to skip i vatnet, fire under bygging og vi veit at det er nye kontraktar på veg. Så eg har trua, seier Stordalen.

Trur på ei lys framtid

– Etter ein nedtur kjem det store moglegheiter, seier Hurtigruten-sjef, Daniel Skjeldam.

Verftsnæringa i Noreg har vore veldig fokusert på olje og gass. Skjeldam seier nøkkelen ligg i å bruke denne kompetansen til å utvikle produkt for nye segment.

– Vi er overbevist om at det vil bli vekst i marknaden for mindre cruiseskip, og vekst i interessa for å reise til unike område.

– Vi tenker langt fram og trur vi skal få tilbake pengane våre på dette i framtida.