Nordlandsforsking har tidlegare sett på kva som tener Møre og Romsdal best. I den rapporten er konklusjonen at Møre og Romsdal har mest å tene på å halde fram som eige fylke.
Men i den siste rapporten har Nordlandsforskning sett på kva som tener Nordmøre best. I rapporten framgår det at Nordmøre har ein del å tene på å bli slått saman med Trøndelag. Og det ideelle for Nordmøre isolert er om heile Møre og Romsdal går saman med Trøndelag om ein felles region.
– Rapporten viser tydeleg at Nordmøre vil ha fordelar av å bli del av ein større region der Trøndelag også er med, seier regionrådsleiar Ola Rognskog.
- Sjå debatt: Går Møre og Romsdal i oppløysing?
Heile Møre og Romsdal
Rapporten slår klart fast at det beste for Nordmøre er om heile Møre og Romsdal blir slått saman med Trøndelag.
– Forskarane er tydelege på at det er ein fordel for Nordmøre om heile Møre og Romsdal blir slått saman med Trøndelag. Ein av grunnane er at Nordmøre vil få ein sentral posisjon i ein slik region, i aksen som kan trekkast frå Ålesund, via Molde til Kristiansund og Trondheim, seier Roland Mauseth i ORKide.
Forskarane har teke utgangspunkt i arbeidsmarknaden, næringsinteresser, sentrum/utkant, forskjellar og likskapar i næringslivet på Nordmøre og i Trøndelag, politikk og kultur.
Nordlandsforsking meiner at Nordmøre har mykje til felles med Trøndelag innan politikk, kulturelt samkvem, næringsliv og innovasjonstankegang. Fylkesgrensa skaper i dag utfordringar for viktige vegprioriteringar og danning av nettverk, heiter det i rapporten.
– Tett vevd med Romsdal
Samstundes meiner forskarane at Nordmøre er tett vevd saman med Romsdal gjennom utstrekt pendling og tilgang til ein større arbeidsmarknad.
– Utfordringa for Nordmøre ligg i å kunne behalde desse fordelane og samstundes utvikle ein positiv synergi med Trøndelag, skriv forskarane i rapporten.
Rapporten påpeikar også at det kan vere negativt for Nordmøre om Sunnmøre hamnar i ein stor vestlandsregion. Eit slikt scenario vil ifølgje Nordlandsforskning svekke aksen Ålesund-Molde- Kristiansund.
Rapporten frå Nordlandsforskning er ein del av ORKide si utgreiing om kvar Nordmøre bør gå i regionreforma.
– Det er viktig å få belyst Nordmøre sine interesser i regionreforma. Vår utgreiing skal medverke til eit betre avgjerdsgrunnlag totalt sett, seier Ola Rognskog, leiar i ORKide.