Ein av fire gjer som Georg (20) og stemmer Senterpartiet

Ein av dei som vil at Jenny Klinge får selskap av Geir Inge Lien på Stortinget er Georg Lillevik (20) frå Sykkylven. Han gjekk inn i lokallaget i heimbygda på Sunnmøre for to år sidan.

– Eg såg meg lei på all sentraliseringa. Eg blei lei av nedlegging av lensmannskontor, helsetenester, og alle andre viktige tenester som gjer det mogleg for folk å bu der dei vil bu, seier han.

Norstat, som har utført målinga for NRK opplyser at feilmarginen i denne målinga varierer mellom 1-4 prosentpoeng

– Fenomenalt artig

Jenny Klinge frå Surnadal har vore stortingsrepresentant for Senterpartiet i 14 år.

– Eg har lengta etter selskap lenge no. Eg har vore aleine Sp-representant frå Møre og Romsdal i alle åra eg har vore på Stortinget. Så dette er heilt fenomenalt artig, seier ho.

Klinge seier at ho eigentleg ikkje er så opptatt av meiningsmålingar.

– Det er ikkje så mange veker igjen til valet, men ei så god måling gir oss eit stort håp om at det skal gå an å få til eit ordentleg godt valresultat, og ikkje minst eit regjeringsskifte.

– Har du kondis til å stå dette løpet?

– I høgste grad. Det handlar mykje om å halde fram med å formidle alt det som vi er opptatt av, og å lytte til folk. Kampen blir nok kjempetøff. Meiningsmålingane er kjekke å sjå på. Men vi må huske på at det er valdagen som tel, seier Klinge.

Høgre stuper

Ved valet i 2017 hadde Høgre ei oppslutning på 23 prosent. No er dei nede på 15. Partiet risikerer no å miste to av tre mandat frå Møre og Romsdal.

Vetle Wang Soleim kom inn som Høgre sin tredjekandidat ved valet i 2017. No er han andrekandidat, men Høgre får berre inn ein representant i denne målinga.

– Vi veit at slike ting har snudd fort. No er vi akkurat i starten av ein valkamp fram mot valdagen. Vi skal brette opp ermene våre og snakke med folk. Vi skal snakke om vår politikk, og snakke om kvifor vi meiner at Erna Solberg er den rette statsministeren, også for de neste fire åra, seier han.

Arbeidarpartiet størst i landet

Per Vidar Kjølmoen (Ap) er førstekandidat i Møre og Romsdal. Han er godt fornøgd med at partiet er størst i landet. Arbeidarpartiet har 25 prosent oppslutning nasjonalt i i NRKs supermåling for august.

– Vi tek ingenting for gitt i Møre og Romsdal. Det blir eit tøft val. Vi kjem til å gi hundre prosent, heilt inn til valdagen for å sikre at eg og Åse Kristin Bakke kjem inn på Stortinget. Vi vil gjerne ha inn Berit Tønnesen frå Kristiansund også, seier Kjølmoen.

• Les også: Støre styrkar stillinga - dreg frå Høgre og Senterpartiet

Stabilt for Framstegspartiet

Frp-bastionen Møre og Romsdal held framleis stand. På landsplan må partiet tole ein tilbakegang og får 10,9 prosent oppslutnad.

Men tala er annleis i heimfylket til partileiar Sylvi Listhaug. Her skårar ho jamt høgt. Dette sikrar Frank Sve, andrekandidaten, ein plass på Stortinget til hausten.

– Vi ligg stabilt rundt 17 prosent og er nå tredje største parti i Møre og Romsdal. Vi vil jobbe hardt for å få et godt valresultat. Frp er garantisten mot venstreradikale parti som vil gjere det vanskelegare og dyrare for folk flest.

Kan få Stortingsplass

To andre parti som overraskar på partimålinga er Raudt og SV. Birgit Oline Kjerstad frå SV håpar på ein plass på Stortinget, og partiet kan stikke av med utjamningsmandatet i Møre og Romsdal.

– Det har eg hatt trua på heile året, heilt frå eg stilte, seier Kjerstad.

For Stein Kristiansen frå partiet Raudt har meiningsmålinga gått over all forventning.

– Møre og Romsdal har ikkje vore kjent for å vere det sterkaste fylket for Raudt. Vi gjekk inn i valkampen med ei målsetting om at vi iallfall skulle bryte sperregrensa for å vere med å dra lasset for heile Raudt. Denne målinga gir oss eit innmari godt løft inn i innspurten i valkampen.