Minst 84 er døde etter terrorangrepet i Nice torsdag kveld. Fleire nordmenn var i området for å sjå fyrverkeriet på nasjonaldagen.
Synnøve Følsvik Lyshol frå Sykkylven skulle krysse gata då ho høyrde hyling og skriking. Familien på fire hadde sett på fyrverkeriet og Lyshol var på veg tilbake til ferieleilegheita, som ligg ved promenaden. Ho stod på fortauet rett ved den kvite bilen som starta å køyre, men skjønte ikkje at bilen hadde noko med oppstyret å gjere.
– Folk sprang og eg høyrde smell, men var usikre på kva det var. Eg starta også å springe, fortel Lyshol.
Dei fortel at dei så barn falle ut av barnevogner og eldre i rullstolar, og at det var forferdelege scener.
LES OGSÅ:
Tenkte terror
Ho tenkte terror med ein gong. Tanken hadde slått henne tidlegare på dagen, då det var samla så mange folk i paraden.
Lyshol såg ikkje at folk vart påkøyrde, men instinktet hennar var å springe så fort ho kunne for å kome i tryggleik. I gangen til leilegheita hadde folk søkt ly, og pressa henne slik at Lyshol ikkje kom seg inn døra. Ho visste at ektemannen Bengt Ronny Lyshol framleis var ute på gata. Dottera og kjærasten var allereie i leilegheita.
– Folk hylte utanfor og banka på. Eg stod paralysert og visste ikkje kva eg skulle gjere, seier Lyshol.
Ho fekk auge på mannen som stod utanfor, men fekk beskjed frå dei andre om å ikkje opne opp døra. Ho fekk forklart at han budde der og måtte få sleppe inn.
Hadde flaks
I etterkant meiner ho at familien hadde flaks, fordi dei var så nær terroråtaket.
No i morgontimane står politiet utanfor leilegheita, fullt væpna, og i heile natt har familien høyrt sirener.
– Vi skal etter planen vere her til tysdag, men har lyst heim. Eg tør ikkje gå ned på strandpromenaden der vi har sola oss og slappa av, seier Lyshol.